XOOKIL 101
Pabloeʼ bisaʼab Roma
U yóoxtéen ka viajarnaj Pablo utiaʼal u kʼaʼaytajoʼ, Jerusalén tu tsʼok xíimbaltaj. Le tiaʼan teʼeloʼ tiʼ maʼachiʼ. Junpʼéel áakʼab le tiaʼan teʼ carceloʼ, tiʼ junpʼéel náayeʼ Jesuseʼ tu yaʼalajtiʼ: ‹Yaan a bin Roma yéetel yaan a kʼaʼaytajiʼ›. Ka luʼsaʼab Pablo Jerusaleneʼ bisaʼab Cesarea tuʼux kʼaʼal dos añosiʼ. Junpʼéel kʼiin le táan u juzgartaʼal tu táan le gobernador Festooʼ, Pabloeʼ tu yaʼalaj: ‹In kʼáat ka u juzgarten César tu kaajil Roma›. Festoeʼ tu núukajtiʼ: ‹Wa a kʼáat ka u juzgartech Cesareʼ yaan in túuxtikech tu yiknal›. Ka túun náaksaʼab Pablo tiʼ junpʼéel barco ku bin Roma. Láakʼintaʼab tumen kaʼatúul sukuʼunoʼob, Lucas yéetel Aristarco.
Le tiaʼanoʼob teʼ kʼáaʼnáaboʼ maʼ páajchaj u seguer u binoʼobiʼ tumen káaj junpʼéel kʼaʼamkach iikʼ xáanchaj yaʼab kʼiinoʼob. Tuláakloʼob tu tukloʼob yaan u kíimloʼob. Chéen baʼaleʼ Pabloeʼ tu yaʼalajtiʼob: «Máakeʼex, juntúul angeleʼ tu yaʼalajten ichil junpʼéel náay: ‹Maʼ chʼaʼik saajkil, yaan a kʼuchul tu kaajil Roma, tsʼoʼoleʼ le máaxoʼob ku binoʼob ta wéeteloʼ yaan xan u salvarkubaʼob›. Le oʼolaleʼ, ¡maʼ a chʼaʼikeʼex saajkil! Maʼ ken k-kíimil».
Ka máan le kʼaʼamkach iikʼ xáanchaj 14 kʼiinoʼoboʼ, páajchaj u yilkoʼob u jáal le kʼáaʼnáaboʼ. Le tu yiloʼoboʼ u islail Malta. Le barcooʼ kʼaʼali yéetel xeʼexetʼpaji, chéen baʼaleʼ le 276 máakoʼob yanoʼoboʼ kʼuchoʼob tu jáal le kʼáaʼnáaboʼ, yaneʼ báabnaji, uláakʼoʼobeʼ tu chʼaʼajoʼob junxóotʼ u cheʼil le barco utiaʼal maʼ u búululoʼoboʼ. U kajnáaliloʼob Maltaeʼ jach tu kanáantaj le máakoʼoboʼ yéetel tu tʼaboʼob kʼáakʼ utiaʼal maʼ u keʼeltaloʼob.
Ka máan tres meseseʼ, le soldadoʼoboʼ tu bisoʼob Pablo tiʼ junpʼéel barco ku bin Roma. Ka kʼucheʼ bin kʼambil tumen le sukuʼunoʼoboʼ. Le ka tu yiloʼobeʼ tu tsʼáaj u graciasil tiʼ Jéeoba yéetel tu yuʼubaj jach líiʼsaʼab u yóol. Kex unaj kaʼach u kʼaʼalaleʼ chaʼab u kajtal tiʼ junpʼéel naj rentartaʼan yéetel kanáantaʼan tumen juntúul soldado. Dos años tu beetaj teʼeloʼ. Ken xíimbaltaʼakeʼ suuk u tʼaan yoʼolal u Reino Dios bey xan yoʼolal Jesús. Pabloeʼ tu tsʼíibtaj xan cartaʼob tiʼ le múuchʼuliloʼob yaan Asia Menor yéetel Judeaoʼ. Lelaʼ ku yeʼesikeʼ Jéeobaeʼ tu yéeyaj Pablo utiaʼal u kʼaʼaytik tiʼ uláakʼ luʼumiloʼob le jatsʼuts baʼaxoʼob ken u beet Diosoʼ.
«Tiʼ tuláakal baʼax k-beetkeʼ k-eʼesik noʼojaʼanoʼon utiaʼal k-meyajtik Dios. Lelaʼ k-beetik ikil u chúukpajal k-óol tiʼ yaʼabkach baʼaloʼob, ikil k-máan tiʼ muʼyajiloʼob, tu kʼiiniloʼob yaan baʼaxoʼob ku bineltiktoʼon, ikil k-máansik talamiloʼob.» (2 Corintoiloʼob 6:4)
Maʼ xaaneʼ jeʼel u yutstal xan ta wicheʼ
KAANBALNAKOʼON TIʼ LE MAʼALOB J-KAʼANSAJOʼ
U angeloʼob Dioseʼ ku yáantkoʼonoʼob
Le angeloʼoboʼ ku yáantik le máaxoʼob yaabiltmil Jéeoba yéetel ku meyajtikoʼoboʼ.
LE BIBLIAOʼ TIʼ BAʼAX KU TʼAAN
Le cartaʼob tu túuxtaj Pablo tiʼ le múuchʼuliloʼoboʼ
¿Baʼax tsolnuʼukiloʼob tu tsʼáaj Pablo utiaʼal le múuchʼuliloʼ? ¿Baʼax tu yaʼalaj yoʼolal le chʼiʼibaloʼ?
