Ló ni rion buelt ni bireʼ Pablo goniʼ xtiitz Dios bidxinbu Jerusalén. Cú gonás buñ láabu. Toib gueʼel laʼga noʼbu press, Jesús góoch láabu ló toib visión: «Sieelo Roma né saniʼlo xtiitz Dios cú». Ór cú goleʼyibu Pablo gudx Jerusalén né goynéyibu Pablo gudx Cesarea. Cú goyoʼbu chop íz lachquiip. Toibtica dzú órni goyeebu nisló Festo ni góc toib buñchiin, Pablo goniʼ: «Nainy naʼ tzaʼya nisló César né láabu gony juzgarbu naʼ lainy gudx Roma». Festo cuapy: «Pal nálo tzeelo ronoʼ César par gony juzgar looy, ná saxela looy ronoʼ César». Goloʼyibu Pablo lainy toib bark ni goyee gudx Roma. Lucas né Aristarco buny compañer láabu.

Órni goyoʼbu ló nisdaʼ góc toib guiébuu ni gocla xidal govitz. Guirá buñ ni goyoʼ lainy bark cú buny pensary que cú ñaityibu. Per Pablo góoch layibu: «Toib ángel góoch naʼ ló bacaʼal: Diti guidzuibylo. Sadxinlo gudx Roma, né guiráca buñ ni noʼ lainy bark salaa. Por ngú, ¡colgap balory! Diti saityno».

Después ni goclayibu ló nisdaʼ por 14 dzú ló buroʼdantcu, ma labúu bibiʼyibu yoo nabich. Bidxinyibu toib isla ni góc laa Malta. Bark cú gogni roloo nisdaʼ né bibílni, per guirá 276 buñ ni goyoʼ lainyni bilaa. Tipnésyibu bisoblo né stipnés biquiin cós xtuny bark cú par labúu bidxinyibu roʼ nisdaʼ. Buñ ni golés Malta gon layibu né goloʼ guii par ñoxidzaʼyibu.

Tzón beʼo después, soldad goloʼyibu Pablo lainy stoib bark par goyeeyibu gudx Roma. Herman bidzaglóo láabu órni bidxinbu. Órni Pablo bibiʼ layibu, biduidybu guixquix Dios né cuaʼbu balory. Ná goyoʼbu press, golésbu lainy toib yoʼ né toib soldad gon láabu. Cú goyoʼbu chop íz. Pablo bisuidybu guirá buñ ni goyguen láabu de Gobierno xtuny Dios né láaca bisuidybu buñ de Jesús. Pablo láaca bicaʼbu guiich par congregación ni goyoʼ Asia Menor né Judea. Jehová nigolú biquiimbu Pablo par naniʼ diitz sacró xtuny Dios a xidal gudxrop.