Jehová Diosajj akham sasaw mä promesa luräna: ‘Janiw jachañasa, usuntañasa, ni jiwañasa jukʼamp utj-jjaniti. Nayranakamatjja taqe jachanakwa phicharäjja. Kuna jan walinakatï nayrajj utjkäna ukanakat janiw amtasjjapjjätati’ sasa.

Jehová Diosajj Adanampiru Evampirojj kusisita suman jakapjjañapatakiw Edén jardinar jaytäna. Alajjpachankir Awkiparuw adorapjjañapäna, wawanakapampiw aka oraq phoqantapjjañaparakïna. Adanampi Evampejj janiw Diosar istʼapkänti. Ukampis Diosan amtapajj pachpakïskiwa. Diosajj promesanakap phoqapuniwa ukwa aka libron yateqtanjja. Diosan Reinopajj walja bendicionanakwa aka oraqer apanini, ukhamatwa kuntï Diosajj Abrahanar siskäna ukajj phoqasini.

Mä qhawqha tiempotjja janiw Supayasa, demonionakasa ni jan wali jaqenakas utj-jjaniti. Taqeniw Jehová Diosar adorjjañäni. Janiw usuntjjañänisa, ni jiwjjañänisa, jan ukasti sapa alwaw wali chʼamani kusisita  sartañäni. Aka oraqejj mä suma paraisoruw tukjjani. Taqeniw suma manqʼanak manqʼasiñäni, suma utanak utachasiñäni. Janiw nuwasiri jan sinttʼasiri jaqenakajj utj-jjaniti, suma jaqekamakiw jakasjjañäni. Salvaje animalanakas janiw ajjsarjjestaniti, ni jiwasas ajjsarjjañäniti.

Jehová Diosajj jiwatanakar jaktaykani ukhajj wali kusiskañäniwa. Abel, Noé, Abrahán, Sara, Moisés, Rut, Ester, David jupanakaruw katoqañäni. Jupanakaw aka oraqe paraisor tukuyañ yanaptʼistani. Trabajos janiw pistʼkaniti, kunayman lurañäni.

Jehová Diosajj Paraison jakasisma ukwa muni. Ukanjja Jehová Dios toqetjja kunayman yateqañäni, kunanaktï jan pienskayätan ukanaksa yateqarakiñäniwa. Ukhamasti, ¡jichhasa wiñayatakisa Jehová Diosar jukʼamp jukʼampi jakʼachasiskakiñäni!