E Jehova yan rẹn wẹẹ: ‘Eve, obalọ, emianmwẹ, kevbe uwu i khian ghi gha rrọọ. I gha khiẹn amẹ eve hin aro iran rre. Te a khian ho emwi dan hia bẹkun.’

E Jehova yi Adam vbe Ivi ye ogba ọghe Idẹni, ne iran gha mwẹ oghọghọ kevbe ọfunmwegbe. Te Osanobua yi iran, ne iran gha ga irẹn kevbe ne iran biẹlẹ vuọn agbọn na. Agharhemiẹn wẹẹ, Adam vbe Ivi he ẹmwẹ ye Jehova obọ, emwamwa ọghe Jehova ma he fiwerriẹ. Ebe na keghi ru iyobọ ne ima, ne ima ya rẹn wẹẹ eyan hia ne Jehova yan rẹn keghi mwẹ amusẹ. Arriọba Osanobua gha rhie afiangbe gie emwa nagbọn zẹvbe ne Jehova yan ma Ebraham.

Vbe nẹi khian ghi kpẹẹ gbe, Setan, ikpayẹ ọre kevbe emwa dan hia ghi khian na wabọre rua. Ẹghẹ nii, emwa hia ghi gha ga e Jehova. Uwu vbe emianmwẹ i khian ghi gha rrọọ. Ma gha wa rhiọrre vbe owiẹ, ma ghi wa gha ghọghọ, ma ghi vbe gha sọyẹnmwẹ egberranmwẹ nọ gbae.  Uhunmwu otagbọn hia ghi do khian e paradais. Evbare ghi kpọ kua ne emwa hia, iran ghi gha mwẹ agbẹkunsotọ vbe owa obọ iran. Ai khian ghi miẹn emwa ni mwẹ ekhọe atosi. Emwa nagbọn kevbe avbe aranmwẹ oha ghi gha rrọọ vbuwe ọfunmwegbe.

Ọ gha rhiẹnrhiẹn gbe, vbe Jehova gha suẹn gha huẹn emwa ni wulo kpaegbe. Ma gha gbe ọbokhian ne eguọmwadia e Jehova nẹdẹ ni khian rhiọkpaegbe. Usun iran keghi re Ebẹl, e Noa, Ebraham, e Sera, e Mosis, e Rut, Ẹsta kevbe Devid. Iran gha deba ima kpe agbọn na huan, nọ do khian e paradais. Emwi wa bun ne ima khian ru vbe Arriọba Osanobua.

E Jehova hoo ne u gha rre evba. Ẹi re avbiẹ emwi ẹre u khian ruẹ vbekpae Jehova vbe agbọn ọgbọn nii. Gi ima hia ne ima gha sikẹ e Jehova sayọ ke ẹghẹ na kpa ya sẹ etẹbitẹ!