Yéhôva a nga ka’ale na: ‘Minyôn, mintaé, akon, nge awu, bia ye fe bo. Ma ye fimine mili’i mese ya mise menan. Mbia be mame ya melu mvus ba ye jañ.’

Yéhôva a nga toé Adam ba Ève afube Éden asu na, be nyiñe mvo’é été a meva’a été. Be mbe be yiane kañe Ésa wop ya yôp été, a jalé si a bone bap. Akusa bo na be nga bo nye melo, nsôñane wé ô nji tyendé. E kalate nyi, bia te yene na, mam mese Zambe a ka’ale ma tôéban. Éjôé jé ja ye soo bibotan e si va, fo’o ve aval a nga ka’ale Abraham.

Ana’ana, Satan, mimbia minsisime mié a mbia be bôt ba ye jañ. Môt ase a ye nyiñ a ye kañe Yéhôva. Bia ye ke beta kon nge wu. Nde fe, bia ye kôlô si tyé ése bi to nya mvo’é minsôn, a meva’a été. Si ése ja ye bo paradis. Môt ase a ye bi mbamba  bidi ya di, a abeñe menda. Bôt bese ba ye bo mbamba nlem; teke môt éziñ a ye bo njet nge évô. Bia ye ke beta ko betite ya fé woñ, be’e fe ba ye ke beta ko bia woñ.

Bi ne ôjeja’a ya yen ane Yéhôva a wômôlô mimbim. Bia ye tame bôte ya melu mvus mbamba nsoan, aval ane Abel, Noé, Abraham, Sara, Moïse, Ruth, Esther a David. Bia be be bia ye saé asu na si ése é bo paradis. Mbamba bisaé ya bo bia ye ke jemban.

Yéhôva a yi na ô tabe valé éyoñ éte. Wo ye kui na ô yeme nye aval ô nji tame simesan. Kele’e ñhe ôsu a subu Yéhôva bebé môs ane môs, ataté éyoñe ji akekui nnôm éto!