Gheall Iehova: ‘Ní bheidh caoineadh, pian, tinneas, ná bás ann níos mó. Glanfaidh mé gach deoir óna súile. Déanfar dearmad ar na drochrudaí go léir a tharla.’

Chuir Iehova Ádhamh agus Éabha i ngairdín Éidin chun go mairfidís go sona sásta. Bhí siad ceaptha a nAthair ar neamh, Iehova, a adhradh agus an domhan a líonadh lena gclann. Cé go raibh Ádhamh agus Éabha easumhal, níor athraigh Iehova a chuspóir riamh. Tá sé feicthe againn ón leabhar seo go dtagann gach rud a gheall Iehova fíor. Déanfaidh Ríocht Dé rudaí iontacha anseo ar an talamh, díreach mar a gheall Iehova d’Abrahám.

Is gearr go mbeidh Sátan agus a chuid deamhain agus na drochdhaoine go léir imithe. Beidh gach a mbeidh beo ag adhradh Iehova. Ní bheidh tinneas ná bás ann. Dúiseoidh muid gach lá i mbarr na sláinte agus bainfidh muid aoibhneas as an saol. Déanfar  parthas den talamh. Beidh neart le hithe ann, agus togha na dtithe. Beidh na daoine cineálta, ní bheidh siad cruálach ná foréigneach. Ní bheidh faitíos ar na hainmhithe fiáine romhainne, agus ní bheidh faitíos orainne rompu.

Is mór an t-údar áthais a bheidh againn nuair a thosóidh Iehova ag tógáil daoine ó mhairbh. Beidh muid in ann fáilte a chur roimh dhaoine a mhair san am a caitheadh. Daoine ar nós Áibil, Naoi, Abrahám, Sárá, Maois, Rút, Eistir, agus Dáiví. Cabhróidh siad linn parthas a dhéanamh den talamh.

Tá Iehova ag iarraidh go mbeidh tú ann. Beidh deis agat fíor-aithne a chur air sa bParthas. Mar sin, ní mór dúinn ár gcairdeas leis a neartú gach lá, anois agus ar feadh na síoraíochta.