Yehowa ewo shi akɛ: ‘Matsumɔ adesai ahiŋmɛiiaŋ yaafonui fɛɛ, ni awerɛhoyeli, piŋmɔ, hela, kɛ gbele sɛɛ baafo. Akaiŋ tsutsu nibii gbohii lɛ eko kwraa dɔŋŋ.’

Yehowa kɛ Adam kɛ Hawa wo Eden abɔɔ lɛ mli koni amɛná miishɛɛ ni amɛhi shi yɛ toiŋjɔlɛ mli. Ekɛɛ amɛ akɛ amɛjá lɛ, ni amɛfɔ koni shikpɔŋ lɛ nɔ ayi obɔ. Adam kɛ Hawa booo Yehowa toi, shi no hãaa etsake yiŋtoo hewɔ ni ebɔ adesai kɛ shikpɔŋ lɛ. Yɛ wolo nɛɛ mli lɛ, wɔna akɛ nɔ fɛɛ nɔ ni Nyɔŋmɔ kɛɔ lɛ, efeɔ. Nyɔŋmɔ Maŋtsɛyeli lɛ kɛ jɔɔmɔi pii baaba shikpɔŋ lɛ nɔ, tamɔ bɔ ni Nyɔŋmɔ wo Abraham shi lɛ.

Etsɛŋ, abaajie Satan, edaimonioi lɛ, kɛ gbɔmɛi fɔji fɛɛ kɛya. Mɛi fɛɛ ni baahi shikpɔŋ lɛ nɔ lɛ baajá Yehowa. Hela mɔŋ wɔ, ni wɔgboiŋ hu. Wɔbaaná gbɔmɔtsoŋ hewalɛ kpakpa daa, ni wɔmii baashɛ wɔhe waa. Shikpɔŋ lɛ baatsɔ paradeiso. Mɔ fɛɛ mɔ baaná  niyenii kpakpa eye. Mɛi ni baahi shikpɔŋ lɛ nɔ lɛ fɛɛ baahi shi shweshweeshwe yɛ shĩai kpakpai amli. Mɔ ko yeŋ mɔ ko awui dɔŋŋ. Moŋ lɛ, mɔ fɛɛ mɔ baajie mlihilɛ kpo etsɔɔ enaanyo. Kooloi awuiyelɔi sheŋ wɔ gbeyei, ni wɔ hu wɔsheŋ amɛ gbeyei.

Yehowa baatee gbohii ashi ni wɔbaaná miishɛɛ waa. Ebaatee mɛi ni hi shi yɛ blema tamɔ Habel, Noa, Abraham, Sara, Mose, Rut, Ester, kɛ David shi. Wɔ kɛ amɛ baafee ekome kɛsaa shikpɔŋ lɛ nɔ fɛfɛo koni etsɔ paradeiso. Wɔbaaná nitsumɔi pii ni yɔɔ miishɛɛ wɔtsu be fɛɛ be.

Yehowa miisumɔ ni ohi Paradeiso lɛ mli. Yɛ jeŋ hee lɛ mli lɛ, obaale Yehowa jogbaŋŋ fe bɔ ni ole lɛ amrɔ nɛɛ po. No hewɔ lɛ, nyɛhãa wɔyaa nɔ wɔtsia wɔbɛŋkɛa Yehowa daa kɛya naanɔ!