Jehova het versproche: «Ich wirde alli Träne vo eune Auge abtröchne. Niemer wird meh truurig sii, Schmerze ha, chrank werde oder sterbe. Alles Schlimme vo früehner wird denn vergesse sii.»

Jehova het wölle, dass de Adam und d Eva für immer im Garte Eden glücklich lebed. Si hätted sölle ihre Vater im Himmel abete und d Erde mit ihrne Chind fülle. Si hend aber Jehova nid gfolget. Trotzdem het Jehova das, wo er sich vorgno het, nie gänderet. I dem Buech hend mir gseh, dass Jehova alles, wo er verspricht, au haltet. Mit sim Königriich wird Jehova wunderbari Sache uf de ganze Erde mache, genau eso wie ers em Abraham versproche het.

Scho glii gits Satan, d Dämone und di böse Mensche nüm. Alli beted denn nur no Jehova a. Es wird niemer meh chrank und es muess niemer meh sterbe. Jede Morge verwached mir fit und voller Energii und freued üs uf de Tag. Di ganzi Erde wird denn es Paradiis sii. Alli hend feins Esse und es Dehei, wo sicher isch. D Mensche sind lieb und nid gemein und brutal. Und d Tier hend kei Angscht vor üs und mir au nid vor ihne.

Wie unbeschriiblich schön wird das sii, wenn Jehova di Tote uferweckt. Mir chönnd denn Lüt vo früehner kennelerne wie de Abel, de Noah, de Abraham und d Sara, de Moses, d Ruth, d Esther und de David. Mit ihne zäme werded mir dra schaffe, dass d Erde zumene Paradiis wird. Und mir chönnd denn immer ganz vil Spannends mache.

Jehova wett, dass du emal im Paradiis lebsch. Denn chasch du Jehova uf e Art kennelerne, wo du dir jetzt gar nid chasch vorstelle. Drum: Chumm Jehova jede Tag nöcher und nöcher – hüt scho und bis in alli Ewigkeit.