Lotusü nünüiki Jeʼwaa wanaa sümaa nümüin: «Talaʼajaweerü suʼwüira soʼu wayuu, müiria nnojoluin ouktaa, mojuu aaʼin, aʼyalajaa, jee saaliin ayuulii, süka sülatajatüin süpüshuaʼale maka aka tia».

Niʼitaain Jeʼwaa Adán otta Eva suluʼu tü apainkat Edén süpüla anain nakuwaʼipa otta talatüinjatüin naaʼin. Naʼwaajüinjachin chi Nashikai Jeʼwaa otta kachoinjanain naya süpüla piratajatüin tü mmakat natuma. Moonooinsalii naya sümaa tü nünüikikat Jeʼwaa, ayatapajaʼa naainjeein Jeʼwaa tü keeʼireetüjütkalia naaʼin süpüleerua tü wayuukalüirua. Suluʼu karaloʼutakat tüü, wekirajaa anainrü nikeraajüin Jeʼwaa waneepia tü nümakat. Eejeerü anaa saaʼu mmakat süpüshuaʼa sutuma tü Nuluwataayakat Maleiwa, nikeraajeerü mayaa tü pütchi nüpansaajakat nümüin Abraham.

Alüʼütsü tü kaʼi eere nnojoleechin Satanaa, na yolujaakana jee tü wayuu mojulaasükalüirua yaa saaʼu tü mmakat. Nieechi neʼe Jeʼwaa suʼwaajaka wayuu  süpüshuaʼa. Nnojoleena waya ayuulin jee outuin waya. Atamaajeena waya sümaa talatüin waaʼin weinshi süka katüin woʼu. Paʼaraiiseerü tü mmakat otta eejeerü emiraa sümaa aneerüin maʼin wepia. Nnojoleerü wayuu eekai mojulaain otta eekai shiʼrülüin wayumüin, anamieerü wayuu süpüshuaʼa. Maüseerü tü mürüt jashichikat maaʼulu.

Talateerü maʼin waaʼin weʼrapa nüsoʼireʼerüin Jeʼwaa naaʼin na outushiikana. Talateena maʼin waya namaa na wayuu makana aka naaʼin Abel, Noé, Abraham, Sara, Moisés, Rut, Ester otta David. Nakaaliinjeena waya süpüla paʼaraiisüinjatüin watuma tü mmakat. Watteerü saalii kasa anasü eeka süpüla waaʼinrüin.

Niʼreein pia Jeʼwaa suluʼu tü Paʼaraiisükat. Watteerü maʼin saalii kasa weʼraajeetka nüchiki Jeʼwaa. ¡Ayata warütkaain maʼin nünainmüin Jeʼwaa maaʼulu otta waainja shia süpüla kaʼikat süpüshuaʼa!