Jehová opromete: “Ndaiporimoʼãvéima omanóva, oñembyasýva, hasẽva ni hasýva. Penderesaráita umi mbaʼe vai yma guarégui”.

Jehová omoĩ vaʼekue Adán ha Évape pe hardín de Edénpe oiko hag̃ua vyʼápe ha pyʼaguapýpe. Haʼekuéra omombaʼeguasu vaʼerã kuri Itúa yvagapeguápe ha ifamília vaʼerã omyenyhẽ hag̃ua ko yvy. Péro Adán ha Eva naiñeʼẽrendúi kuri Jehovápe, upéicharõ jepe Jehová nokambiái umi mbaʼe heʼi vaʼekue ojapotaha. Ko lívrope jahecháma Jehová siémpre okumpliha la oprometéva. Jahecha Irréino rupive oguerutaha heta mbaʼe porã ko yvy ape ári ha péicha okumplíta pe opromete vaʼekue Abrahánpe.

Koʼẽrõite ndoexistimoʼãvéima Satanás, idemoniokuéra ni umi hénte iñañáva. Enterovénte oadoráta Jehovápe añoite. Nañamanomoʼãvéima ni nañanderasymoʼãvéima, síno káda día ñanekoʼẽ porãta ha javyʼáta jaikove haguére. Ko yvýgui oikóta peteĩ paraíso. Enterovéva orekóta hóga ha ndofaltamoʼãi jaʼu vaʼerã. Ndaiporimoʼãvéima hénte ivioléntova ni  ipyʼahatãva, síno persóna ivuénova añoite. Umi animál salváhe jepe ndokyhyjemoʼãi ñandehegui ni ñande chuguikuéra.

Igustoitereíta ág̃a Jehová oñepyrũ vove omoingove jey umi omano vaʼekuépe. Jarresivíta umi persóna yma guarépe, por ehémplo Abel, Noé, Abrahán, Sara, Moisés, Rut, Ester ha David. Haʼekuéra ñanepytyvõta jajapo hag̃ua ko yvýgui peteĩ paraíso. Siémpre jarekóta kósa iñinteresánteva jajapo hag̃ua.

Jehová oipota nde avei reiko pe paraísope. Upépe ñaaprendéta hetave mbaʼe ni ndajaikuaái vaʼekue Jehovágui. Upévare, eñemoag̃uivékena Jehováre káda día, ejapo upéva koʼág̃a ha opa árare.