NUPINPLỌN 103
“Na Ahọluduta Towe Ni Wá”
Jehovah dopagbe dọmọ: ‘Avi, awufiẹsa, azọ̀n kavi okú ma nasọ tin ba. Yẹn na súnsún dasin lẹpo sẹ̀ sọn nukun yetọn mẹ. Nuylankan he ko jọ wayi lẹpo wẹ na yin winwọn.’
Jehovah ze Adam po Evi po do jipa Edẹni tọn mẹ, na yé nido nọgbẹ̀ to jijọho po ayajẹ po mẹ. Yé dona sẹ̀n Otọ́ olọn mẹ tọn yetọn bo ji ovi lẹ nado gọ́ aigba ji. Adam po Evi po vẹtolina Jehovah, amọ́ lẹndai etọn ma diọ. To owe ehe mẹ, mí ko mọdọ opagbe he Jiwheyẹwhe do lẹpo wẹ nọ mọ hẹndi. Ahọluduta etọn na hẹn dona jiawu lẹ wá aigba ji, kẹdẹdile e ko dopà etọn na Ablaham do.
To madẹnmẹ, Satani, aovi etọn lẹ po mẹylankan lẹpo po na busẹ. Mẹhe togbẹ̀ lẹpo wẹ na nọ sẹ̀n Jehovah. Mí ma nasọ jẹazọ̀n kavi kú ba. Kakatimọ, mí na nọ fọ́n egbesọegbesọ po agbasalilo dagbe po bo na nọ jaya dọ mí togbẹ̀. Aigba na lẹzun paladisi de. Mẹlẹpo wẹ na nọ mọ núdùdù dagbe dù bo tin to hihọ́ glọ to owhé yetọn gbè. Mẹlẹ na jọmẹ bo ma na nọ ylanhùn kavi wadanu do mẹgo. Gbekanlin lẹ ma na nọ dobuna mí, podọ mí ma na nọ dibuna yé.
Ojlẹ ayajẹ tọn wẹ e na yin, whenue Jehovah na jẹ mẹlẹ fọnsọnku ji. Mí na dokuavọna omẹ hohowhenu tọn delẹ taidi Abẹli, Noa, Ablaham, Sala, Mose, Luti, Ẹsteli po Davidi po. Yé na wazọ́n hẹ mí nado diọ aigba blebu zun paladisi. Mí na nọ tindo azọ́n dagbe susu nado wà to whepoponu.
Jehovah jlo dọ a ni tin to finẹ. A na wá yọ́n nuhe a ma ko lẹn pọ́n gbede delẹ gando ewọ go. Gbọ mí ni nọ dọnsẹpọ Jehovah dogọ egbesọegbesọ, sọn din podọ kakadoi!
“Jehovah Jiwheyẹwhe mítọn, hiẹ wẹ jẹ nado mọ gigo, gbégbò po huhlọn po yí, na hiẹ wẹ dá nulẹpo, podọ to ojlo towe mẹ wẹ yé do wá aimẹ bosọ do yin didá.”—Osọhia 4:11
