Si Jehova nagpromisa: ‘Wala na sing paghibi, kasakit, balatian, ukon kamatayon. Pahiran ko ang tagsa ka luha sa ila mga mata. Ang tanan nga malain nga butang sang nagligad nalimtan na.’

Ginbutang ni Jehova si Adan kag si Eva sa hardin sang Eden para mag-istar didto nga may paghidait kag kalipay. Dapat kuntani nila simbahon ang ila Amay sa langit kag pun-on ang duta sang ila mga kabataan. Bisan wala gintuman ni Adan kag ni Eva si Jehova, wala gid nagbag-o ang iya katuyuan. Natun-an naton sa sini nga libro nga ang tanan nga ginpromisa sang Dios matuman. Ang Iya Ginharian magadala sing dalayawon nga mga pagpakamaayo sa duta, pareho sang ginpromisa niya kay Abraham.

Sa indi madugay, laglagon si Satanas, ang iya mga demonyo, kag ang tanan nga malain nga tawo. Ang tanan nga tawo nga nagakabuhi magasimba kay Jehova. Indi na kita magmasakit ukon mapatay.  Magabugtaw kita kada adlaw nga mapagros ang panglawas kag malipayon. Mangin paraiso na ang duta. May masustansia nga pagkaon kag kaugalingon nga balay ang tanan. Mangin mabuot na ang mga tawo, indi mapintas ukon bayolente. Mangin mahagop na ang ilahas nga mga sapat, kag indi na kita mahadlok sa ila.

Mangin makalilipay gid kon banhawon na ni Jehova ang mga tawo. Abiabihon naton ang mga tawo sang una, pareho nanday Abel, Noe, Abraham, Sara, Moises, Rut, Ester, kag David. Mangin kaupod naton sila sa paghimo sang Duta nga paraiso. Madamo gid pirme sing makawiwili nga mga hilikuton didto.

Gusto ni Jehova nga didto ka. Makilala mo sia didto sa paagi nga wala mo gid ginaimadyin. Panikasugan naton nga mangin suod pa gid kay Jehova kada adlaw, subong asta sa wala sing katubtuban!