Jehova wa kwizika a tja: ‘Kape nakukara omaririro, omihihamo, omitjise poo onḓiro. Ami me yeka omahoze aehe momeho wawo. Oviṋa avihe vyoruveze orukuru mavi zembwa.’

Jehova wa twa Adam na Eva motjikunino tjaEden kutja ve kare mondjoroka nohange. Owo aave sokurikotamena ku Ihe yawo womeyuru nokuurisa ehi arihe novanatje vawo. Adam na Eva kave karere nonḓuviro ku Jehova, posiya ondando Ye kaina pu ya runduruka. Membo ndi, twa munu kutja oviṋa avihe Mukuru mbya hunganeka vya rira ouatjiri. Ouhona we mau kaeta ozondaya zatjiri kombanda yehi, otja tja kwizikira Abraham.

Moruyaveze rwopopezu, Satan nozondemone ze novandu avehe ovarunde kave nakukara po rukwao. Ovandu avehe mbu mave hupu mave rikotamene ku Jehova. Eṱe kamaatu vere poo okukoka. Nungwari eyuva arihe matu penduka nomasa omahimise atu  nondjoroka kutja tu nomuinyo. Ehi mari rire oparadisa. Omundu auhe ma kara novikurya oviwa okurya nozondjuwo ozombwa. Ovandu mave kara nomitima omiwa nungwari kave nakurira ovanautwe. Ovipuka vyokuti kamaavi tu tira, nu eṱe kamaatu vi tira wina.

Tjiri ma rire oruveze rwondjoroka indu Jehova tji ma kapendura ovaṱi. Eṱe matu kayakura ovandu voruveze orukuru, tjimuna Abel, Noa, Abraham, Sara, Moses, Rut, Ester na David. Owo mave ungura puna eṱe okutanaurira Ehi ndi moparadisa. Tjiri mape kara oviungura ovingi nu oviwa okuungura.

Jehova ma vanga kutja ove u kakare mbo. Ove mo ke mu tjiwa momuhingo mbu u hina oo undjire ko kaparukaze. Ngatu tumbuke popezu na Jehova eyuva arihe nga konga aruhe!