Jihova ọ ya eyaa nọ: ‘Edada, oviẹ, ẹyao, hayo uwhu, e gbẹ te jọ ofa ha. Me ti ririe irui oviẹ kpobi no aro rai. Ahwo a gbẹ te kareghẹhọ eware iyoma nọ e via vrẹ no ho.’

Jihova o fi Adamu avọ Ivi họ ogba Idẹn re a rria dhedhẹ avọ evawere. A vẹ gọ Jihova nọ ọ rrọ Ọsẹ obọ odhiwu rai, je yẹ emọ vọ akpọ na kpobi. Dede nọ Adamu avọ Ivi a yoẹme kẹ Ọghẹnẹ hẹ, ẹjiroro Ọghẹnẹ o nwene he. Ma jọ obe nana ruẹ nọ eware kpobi nọ Ọghẹnẹ ọ ya eyaa rai, i ti rugba. Uvie Ọghẹnẹ o te wha eghale buobu ziọ akpọ na wọhọ epanọ Ọghẹnẹ ọ ya eyaa riẹ kẹ Abraham.

Kẹle na, Ọghẹnẹ ọ te raha Setan avọ idhivẹri riẹ gbe ahwo oyoma kpobi no. Ahwo kpobi nọ a te rria akpọ na a te gọ Jihova. Ma te gbẹ mọ hayo whu hu. Ukpoye, ma te rọwo ze kẹdẹ kẹdẹ  avọ omokpokpọ gbe evawere. Akpọ na kpobi o ve ti zihe ruọ aparadase. Ahwo kpobi a te re emamọ emu, jẹ rria iwou rai avọ omofọwẹ. Ahwo a te jọ wowou, a te geva hayo ru ozighi hi. Ma te gbẹ dhozọ erao ijihẹ hẹ, yọ e te dhozọ mai gbe he.

Eva e te were omai gaga nọ Jihova ọ te kpare ahwo nọ a whu no ze. Ma ti dede ahwo oke anwae nọ a whu no zihe ziọ uzuazọ wọhọ Ebẹle, Noa, Abraham, Sera, Mosis, Rut, Ẹsta, gbe Devidi. A ti kuomagbe omai ru otọakpọ na soso zihe ruọ aparadase. Iruo buobu nọ e rẹ kẹ evawere e te jariẹ nọ ahwo a ti ru.

Jihova ọ gwọlọ nọ whọ jọ etẹe. Who ti wuhrẹ kpahe Jihova jẹ riẹe vi epaọ anwẹdẹ. Joma si kẹle Jihova kẹdẹ kẹdẹ no enẹna rite ebẹdẹ bẹdẹ!