Yeova aiweta maũndũ ala ũkeka ĩvindanĩ yũkĩte aisye atĩĩ: ‘Kũikethĩwa kĩĩo, woo, mowau kana kĩkwʼũ. Ngavangũla methoi onthe kuma methonĩ ma andũ, na maũndũ mathũku ala mekĩkaa ũmũnthĩ maikalilikanwa ĩvindanĩ yĩu.’

Yeova amina kũmba Atamu na Eva, amaiie mũũndanĩ wa Eteni mekalae vo me na ũtanu na mũuo. Maaĩlĩte kũmũthaithaa Yeova, Ĩthe woo wa ĩtunĩ na maisyaana mausũsye nthĩ. Ĩndĩ ũndũ wa kũmakya nĩ kana, Atamu na Eva mayaamwĩthukĩĩsya Yeova. O na ũu wĩ o vo, Yeova ndaaekana na kĩeleelo kyake kweleka andũ. Ĩvukunĩ yĩĩ nĩtwoona kana Yeova nĩwĩanĩasya maũndũ onthe ala wathana. Akatũmĩa Ũsumbĩ wake kũetee andũ onthe moathimo, o ũndũ wathĩte Avalaamu.

O mĩtũkĩ, Satani, ndaimoni syake, vamwe na andũ ala athũku onthe makaanangwa. Ĩvindanĩ yĩu, onthe ala makethĩwa me thayũ makamũthaithaa Yeova. Tũikawaa kana kũkwʼa. Vandũ va ũu, tũkamũkaa kĩla mũthenya twĩ na vinya na twĩ atanu. Nthĩ  ĩkatwʼĩkĩthwʼa vandũ vaseo wa kwĩkala. Kĩla mũndũ akethĩwa na lĩu na mũsyĩ mũseo. Na andũ maikethĩwa angʼendu, vandũ va ũu makeethĩwa me aseo na makewʼanĩaa tei. Nasyo nyamũ sya kĩthekanĩ iikakĩaa andũ, na andũ maikaikĩaa.

Ũkeethĩwa wĩ ũndũ wa kũtanĩthya mũno yĩla Yeova ũkambĩĩa kũthayũũkya andũ. Tũkathokya andũ ala makwie tene, ta Aveli, Noa, Avalaamu, Sala, Mose, Luthi, Esita, na Ndaviti. Tũkatetheanĩsya namo kũseũvya nthĩ yĩthĩwe vandũ vaseo va kwĩkala. Ĩvindanĩ yĩu, kũkeethĩwa na wĩa mwingĩ wa kũtanĩthya.

Yeova nũkwenda mũno wĩĩthĩwa vo. Ũkamanya maũndũ maingĩ mũno ĩũlũ wake. Kwoou, ekai kĩla ũmwe witũ atate ũndũ ũtonya aendeee kũlũlũmĩĩlya ũnyanya wake na Yeova ũmũnthĩ, na kũvika tene na tene.