Jeová promete: ‘Ningen ka ta ben txora más, ka ta ten más dór, nen duénsa, nen mórti. N ta linpa lágua di ses odju. Kuzas di pasadu ka ta lenbradu más.’

Jeová poi Adon ku Eva na jardin di Éden pa vive ku pas i pa es ser filís. Es ta adoraba ses Pai na Séu i es ta intxiba Téra ku ses fidju. Adon ku Eva ka obi ku Jeová, má Se obijetivu nunka ka muda. Na kel livru li nu odja ma tudu kel ki Deus promete ta kunpri. Se Reinu ta ben traze txeu benson pa Téra, sima el prometeba Abraon.

Ka ta dura, Satanás ku se dimónis i tudu kes algen mau ta dexa di izisti. Tudu kes algen ki fika bibu ta adora Jeová. Nu ka ta fika duenti nen nu ka ta móre más. Má, tudu dia nu ta korda xeiu di forsa i kontenti di sta bibu. Téra interu ta ben bira un  paraízu. Tudu algen ta ben ten bons kumida i kazas ku suguransa. Ka ta ben ten maldadi nen violénsia, tudu algen ta ben ama kunpanheru. Nu ka ta ten medu di animal brabu i nen es ka ta xinti medu di nos.

Nu ta ben fika rei di kontenti óras ki Jeová kumesa ta resusita algen. Nu ta ben resebe kes algen ki móre na ténpu antigu sima, Abel, Nué, Abraon, Sara, Muizes, Ruti, Ester i Davidi. Es ta ben djunta ku nos na bira Téra interu un paraízu. Ta ben ten sénpri trabadju ki bale péna.

Jeová krê pa bu sta na Paraízu. Bu ta ben konxe Jeová di maneras ki nunka bu ka imajinaba. Nu sforsa tudu dia pa nu bira más amigu ku Jeová, gósi i pa tudu ténpu!