Li Jehobʼa kixye chaq: «Maakʼaʼaq chik li yaabʼak, li rahilal, li yajel chi moko li kamk. Tinchaqihobʼresi li xyaʼalebʼ ru. Inkʼaʼ chik teʼxjultika li maaʼusilal li xkʼulmank chaq».

Li Jehobʼa kixkʼe laj Adan ut xʼEva saʼ li naʼajej Eden re naq teʼwanq saʼ sahilal ut saʼ tuqtuukilal. Tento teʼxloqʼoni li Xyuwaʼ li wank saʼ choxa ut teʼwanq naabʼal xkokʼal re naq teʼxnujobʼresi li Ruuchichʼochʼ. Laj Adan ut xʼEva inkʼaʼ keʼabʼink chiru li Jehobʼa, abʼan li kiraj saʼ xtiklajik maajiʼ najalaak. Saʼ li tasal hu aʼin xqil naq li Yos junelik naxbʼaanu li naxyeechiʼi. Li Xʼawabʼejilal tixkʼam chaq li osobʼtesink saʼ ruuchichʼochʼ, ut chi joʼkan ttzʼaqloq ru li kixyeechiʼi re laj Abrahan.

Chi seebʼ maakʼaʼaq chik laj Tza, ebʼ li maaʼus aj musiqʼej ut ebʼ li poyanam li maaʼusebʼ xnaʼlebʼ. Chixjunilebʼ teʼxloqʼoni li Jehobʼa. Inkʼaʼ chik tooyajerq chi moko tookamq, wulaj wulaj bʼan toowakliiq chi kʼajoʼaq qametzʼew ut sahaq saʼ qachʼool xbʼaan qayuʼam. Tchʼinaʼusoʼq  li Ruuchichʼochʼ. Tqawaʼ li sahil tzakahemq ut chaabʼilaq qochoch. Maakʼaʼaq chik li rahobʼtesink, li maaʼusilal, chixjunilebʼ chaabʼilaqebʼ xnaʼlebʼ. Ebʼ li josqʼ aj xul inkʼaʼ tooʼeʼxxuwa chi moko laaʼo tqaxuwahebʼ.

Kʼajoʼaq xchʼinaʼusal naq li Jehobʼa t-oq xwaklesinkil ebʼ li kamenaq. Tqakʼulebʼ laj Abel, laj Noe, laj Abrahan, li xSara, laj Moises, li xRut, li xʼEster ut laj David. Ut tooʼeʼxtenqʼa chi xchʼinaʼusinkil li Ruuchichʼochʼ. Junelik wanq ebʼ li naʼlebʼ li twulaq chiqu xbʼaanunkil.

Li Jehobʼa naraj naq tatwanq saʼ li chʼinaʼusil naʼajej aʼin. Aran tqatzol naabʼal li naʼlebʼ chirix li Yos li maajunwa xqakʼoxla chaq. Joʼkan naq, jilonqo wulaj wulaj chixkʼatq li Jehobʼa, anaqwan ut chi junelik!