Jehova eeranĩire ũũ: ‘Gũtigaacoka gũkorũo na kĩrĩro, ruo, mĩrimũ, kana gĩkuũ. Nĩ ngeeheria maithori mothe maitho-inĩ mao. Maũndũ mothe moru ma tene matikaaririkanwo.’

Jehova aaigĩte Adamu na Hawa mũgũnda-inĩ wa Edeni matũũre na thayũ na gĩkeno. Maagĩrĩirũo gũthathayagia Ithe wao wa igũrũ na maciarane maiyũrie thĩ. Adamu na Hawa nĩ maagire gwathĩkĩra Jehova, no muoroto wake ndwacenjirie. Thĩinĩ wa ibuku rĩrĩ nĩ tuona atĩ ũndũ o wothe Ngai eranĩire nĩ ũhingaga. Ũthamaki wake nĩ ũkaarehe irathimo cia magegania thĩinĩ wa thĩ, o ta ũrĩa eerĩire Iburahimu.

Ica ikuhĩ, Shaitani, ndaimono ciake, na andũ arĩa othe oru nĩ mekũniinwo. Andũ arĩa othe magaakorũo muoyo magaathathayagia Jehova. Tũtikaarũaraga kana tũgakua. Handũ ha ũguo, tũgookĩraga o mũthenya tũrĩ na hinya mũingĩ na tũrĩ na gĩkeno nĩ ũndũ wa gũkorũo tũrĩ muoyo. Thĩ yothe  ĩgaatuĩka paradiso. Mũndũ wothe agaakoragwo na irio njega na mũciĩ ũrĩ na ũgitĩri. Andũ magaakoragwo marĩ na tha. Nyamũ itigatwĩtigĩraga, kana ithuĩ tũgaciĩtigĩra.

Ũgaakorũo ũrĩ ũndũ wa gĩkeno mũno rĩrĩa Jehova akaambĩrĩria kũriũkia andũ. Nĩ tũkanyita ũgeni andũ arĩa maakuire tene ta Habili, Nuhu, Iburahimu, Sara, Musa, Ruthu, Esiteri, na Daudi. Nĩ makaanyitanĩra na ithuĩ gũtua thĩ paradiso. Hingo ciothe gũgaakoragwo na mawĩra maingĩ mega ma kũruta.

Jehova arenda ũgaakorũo kuo. Nĩ ũkaamũmenya na njĩra nyingĩ iria ũtarĩ weciria. Rekei tũkuhĩrĩrie Jehova o mũthenya, rĩu, na tene na tene!