ETUKULWA 103
“Ouhamba woye nau uye”
Jehova okwa udaneka a ti: ‘Itaku ka kala vali okulila, ouyahame, omikifi ile efyo. Ohandi ka feta po omahodi momesho avo. Oinima aishe ii oyo ya ningwa monakudiwa otai ka dimbuwa.’
Jehova okwa li a tula Adam naEva moshikunino shaEden opo ngeno va kale mombili nova hafa. Ova li ve na okulongela Xe yavo yomeulu nokuyadifa edu noludalo lavo. Adam naEva kava li va dulika kuJehova, ashike elalakano laye inali lunduluka. Membo eli, otwa mona kutya keshe osho Kalunga a udaneka ohashi wanifwa. Ouhamba waye otau ka eta omanangeko noupuna makumwifi kombada yedu, ngaashi ashike a udanekela Abraham.
Mafiku Satana neendemoni daye nosho yo ovanhu aveshe ovo hava longo owii otava ka hanaunwa po. Aveshe ovo tava ka kala nomwenyo otava ka longela Jehova. Itatu ka vela vali nokufya. Ponhele yaasho, ohatu ka penduka keshe efiku tu na oukolele muwa nokuhafela onghalamwenyo. Edu otali ka ninga oparadisa. Keshe umwe ota ka kala e na oikulya iwa nosho yo eumbo la amenwa. Ovanhu otava ka kala ovanambili ndele havakwanyanya ile hava longifa eenghono. Oifitukuti itai ke tu tila vali, nafye itatu ke i tila.
Ohatu ka kala twa hafa neenghono eshi Jehova ta ka nyumuna ovanhu. Ohatu ka hambelela ovanhu vonale, ngaashi Abel, Noa, Abraham, Sara, Moses, Rut, Ester naDavid. Ohatu ka longa pamwe navo mokuninga edu alishe oparadisa. Ohatu ka kala alushe tu na oilonga ihokwifa.
Jehova okwa hala u ka kale moparadisa. Oto ke mu shiiva nawa shi dulife nale. Natu kale hatu ehene popepi elela naJehova efiku keshe, nofiyo alushe!
“Omwene wetu naKalunga ketu, Ove owa wana okutambula efimano nefimaneko nepangelo, osheshi Ove wa shita oinima aishe.” — Ehololo 4:11
Otashi dulika yo u hafele oikundafanwa ei
OMBIBELI OI NA ETUMWALAKA LILIPI?
Etumwalaka lOmbibeli—Engongo
Ongahelipi Jehova a enda ta holola kanini nakanini kutya Jesus oye a li ta ka kala Messias, oo ta ka ninga vali edu oparadisa?
