មេរៀនទី១០៣
«សូមឲ្យរាជាណាចក្ររបស់លោកបានមកដល់»
ព្រះយេហូវ៉ាបានសន្យាថា៖ ‹នឹងលែងមានការស្រែកយំ ការឈឺចាប់ ជំងឺ និងសេចក្ដីស្លាប់ទៀត។ ខ្ញុំនឹងជូតអស់ទាំងទឹកភ្នែកចេញពីភ្នែករបស់ពួកគេ។ អ្វីៗដ៏អាក្រក់ដែលធ្លាប់កើតឡើងពីមុន នោះបានកន្លងបាត់អស់ហើយ›។
ព្រះយេហូវ៉ាបានដាក់អាដាមនិងអេវ៉ានៅក្នុងសួនអេដែន ដើម្បីឲ្យពួកគេមានជីវិតដ៏សុខសាន្តនិងសុភមង្គល។ ពួកគេត្រូវគោរពប្រណិប័តន៍បិតាស្ថានសួគ៌របស់ពួកគេ ព្រមទាំងបង្កើតកូនឲ្យពេញផែនដី។ គួរឲ្យស្ដាយ អាដាមនិងអេវ៉ាមិនស្ដាប់បង្គាប់ព្រះយេហូវ៉ាទេ។ ប៉ុន្តែ នោះមិនបានផ្លាស់ប្ដូរគោលបំណងរបស់លោកឡើយ។ តាមរយៈសៀវភៅនេះយើងបានរៀនថា អ្វីទាំងអស់ដែលព្រះបានសន្យាតែងតែកើតឡើងជានិច្ច។ នៅអនាគត រាជាណាចក្ររបស់ព្រះនឹងនាំមកនូវពរដ៏អស្ចារ្យសម្រាប់ផែនដី ដូចលោកបានសន្យានឹងអាប្រាហាំ។
ឆាប់ៗនេះ សាថាន ពួកវិញ្ញាណកំណាចរបស់វា និងមនុស្សអាក្រក់ទាំងអស់នឹងលែងមានទៀត។ មនុស្សគ្រប់រូបនៅផែនដីនឹងគោរពប្រណិប័តន៍ព្រះយេហូវ៉ា។ យើងនឹងមិនឈឺ ឬស្លាប់ឡើយ។ ផ្ទុយទៅវិញ រាល់ថ្ងៃពេលភ្ញាក់ពីគេង យើងនឹងពោរពេញដោយកម្លាំង ភាពស្រស់ស្រាយ និងសប្បាយរីករាយ។ ផែនដីនឹងក្លាយជាសួនឧទ្យាន។ មនុស្សគ្រប់គ្នាមានអាហារល្អៗ និងមានផ្ទះដ៏កក់ក្ដៅ។ មនុស្សទាំងអស់មានចិត្តល្អ ហើយលែងធ្វើអំពើឃោរឃៅទៀត។ សត្វព្រៃមិនខ្លាចមនុស្ស ហើយមនុស្សក៏មិនខ្លាចសត្វព្រៃដែរ។
ពេលព្រះយេហូវ៉ាចាប់ផ្ដើមប្រោសមនុស្សស្លាប់ឲ្យរស់ឡើងវិញ នោះប្រាកដជាធ្វើឲ្យយើងរំភើបចិត្តណាស់! យើងនឹងជួបបុគ្គលពីសម័យបុរាណដូចជាអេបិល ណូអេ អាប្រាហាំ សារ៉ា ម៉ូសេ រូថ អេសធើរ និងដាវីឌ។ យើងរួមគ្នាជាមួយពួកគាត់ធ្វើឲ្យផែនដីទាំងមូលក្លាយជាសួនឧទ្យាន។ យើងនឹងធ្វើកិច្ចការសប្បាយៗជាច្រើន។
ព្រះយេហូវ៉ាចង់ឲ្យអ្នករស់នៅក្នុងសួនឧទ្យាន។ ពេលនោះ អ្នកនឹងស្គាល់លោកច្រើនជាងដែលអ្នកអាចស្រមៃឃើញឥឡូវនេះ។ សូមបន្តជិតស្និទ្ធនឹងព្រះយេហូវ៉ាឲ្យកាន់តែខ្លាំងនៅឥឡូវ និងជារៀងរហូត!
«ព្រះយេហូវ៉ាជាព្រះរបស់យើងអើយ លោកសមនឹងទទួលសេចក្ដីសរសើរដោយសារសិរីរុងរឿង កិត្តិយស និងឫទ្ធានុភាព ពីព្រោះលោកបានបង្កើតអ្វីៗទាំងអស់»។—ការបើកបង្ហាញ ៤:១១
លោកអ្នកក៏ប្រហែលជាចូលចិត្តដែរ
គម្ពីរបរិសុទ្ធ តើរៀបរាប់អំពីអ្វី?
ផែនដីក្លាយទៅជាសួនឧទ្យាន!
តើសៀវភៅការបើកបង្ហាញបានបញ្ចប់ព័ត៌មានក្នុងគម្ពីរយ៉ាងដូចម្ដេច?
