Jiova dɔn prɔmis se: ‘Kray, pen, sik, ɛn day nɔ go de igen. A go wep ɔl di kray wata na dɛn yay. Dɛn nɔ go mɛmba ɔl di bad bad tin dɛn we bin de apin trade.’

Jiova put Adam ɛn Iv na di gadin na Idɛn fɔ mek dɛn liv de wit pis ɛn gladi-at. Dɛn fɔ wɔship dɛn Papa we de na ɛvin ɛn ful-ɔp di wɔl wit dɛn pikin dɛn. Adam ɛn Iv nɔ bin obe Jiova, bɔt wetin Jiova want fɔ mɔtalman nɔ ɛva chenj. Insay di Baybul, wi dɔn si se ɔl wetin Jiova prɔmis go mɔs apin. In Kiŋdɔm go briŋ wɔndaful blɛsin dɛn na di wɔl jɔs lɛk aw i bin dɔn prɔmis Ebraam.

I nɔ go te igen Setan, in dimɔn dɛn, ɛn ɔl di bad pipul dɛn nɔ go de igen. Ɔlman we gɛt layf go wɔship Jiova. Wi nɔ go sik ɔ day. Bifo dat, wi go gɛt bɔku ɛnaji ɛn wi go gladi we wi de alayv. Di wɔl go bi Paradays. Ɔlman go gɛt gud it ɛn sef ples fɔ  de. Pipul dɛn go de du gud, ɛn dɛn nɔ go de trit pipul dɛn bad ɔ du wikɛd tin to dɛn. Wayl animal dɛn nɔ go fred wi ɛn wisɛf nɔ go fred dɛn.

Wi go rili gladi we Jiova go bigin gi layf bak to pipul dɛn we dɔn day. Wi go wɛlkɔm pipul dɛn we bin de trade lɛk Ebɛl, Noa, Ebraam, Sera, Mozis, Rut, Ɛsta, ɛn Devid. Dɛn go jɔyn wi fɔ mek di wɔl bi Paradays. Wi go gɛt bɔku fayn fayn wok dɛn fɔ du.

Jiova want yu fɔ de de. Yu go kam fɔ sabi Jiova di kayn we aw yu nɔ bin de tink bɔt am. Lɛ wi kɔntinyu fɔ go nia Jiova mɔ ɛn mɔ ɛvride, naw ɛn sote go!