Yave wasia nsilu vo: ‘Ke vekala diaka dilu ko, mpasi, mayela yovo lufwa. Ikunguna mansanga mawonso muna meso mau. Mambu mawonso mambi mevilakanwa.

Yave wasia Adami yo Eva muna mpatu ya Edene kimana bazingila mu luvuvamu ye kiese. Diavavanga vo basambila Se diau kuna zulu yo zadisa e nza yo wan’au. Adami yo Eva bakolamena Yave, kansi e kani diandi ke diasoba ko. Mu nkanda wau, tumuene vo e nsilu miawonso mia Nzambi lungana milungana. E Kintinu kiandi kisinga twasa nsambu zayingi ova ntoto nze una kasila nsilu kwa Abarayama.

Ke kolo ko, Satana, nkuya miandi ye wantu awonso ambi befwaswa. Awonso bekala o moyo Yave besambila. Ke tuyela diaka ko ngatu fwa. Konso lumbu, tusikama ye ngolo muna nitu ye kiese kia zinga. E nza yawonso ikituka se paradiso. Awonso bekala ye madia mambote ye nzo zatoma tungwa.  Wantu bekala ye zola, ke akwa nsoki ko yovo yimpumbulu. E bulu ya futa ke bekutumona wonga ko, yeto mpe ke tukubamona wonga ko.

Kiese kiayingi tumona vava Yave keyantika futumuna ana bafwa. Tusinga tambula wantu a nz’ankulu nze Abele, Noa, Abarayama, Sara, Mose, Rutu, Esete yo Davidi. Tusala yau entwadi mu kitula e nza yawonso se paradiso. Salu kiakiese tukala kiau.

Yave ozolele vo wakala muna paradiso. Otoma kunzaya mu mpila ina kuyindulanga nkutu ko. Yambula twakwamanana finama Yave lumbu yawonso, tuka wau ye yakwele mvu!