Jehova usepisa kuli: ‘Hakuna yakalila, kuutwa butuku, kukula, kamba kushwa. Nikatakula miyoko kaufela kwa meeto abona. Lika kaufela zemaswe za kwamulaho halisana kuhupulwa.’

Jehova naabeile Adama ni Eva mwa simu ya Edeni kuli bapile mwa kozo inze batabile. Nebaka lapela feela Ndataa bona ni kutaza lifasi ka bana babona. Adama ni Eva nebasika utwa Jehova, kono mulelo wahae neusika cinca. Mwa buka ye, luboni kuli lika kaufela zasepisa Mulimu walitalelezanga. Mubuso wahae ukatisa limbuyoti zende fa lifasi, sina feela mwanaasepiselize Abrahama.

Hona cwale-cwale fa, Satani, madimona bahae, ni batu kaufela babamaswe bakayundiswa. Batu kaufela babaka punyuha bakalapela Jehova. Haluna kukula kamba kushwa. Kono zazi ni zazi, lukazuha inge lunani maata, mi lukaba ni tabo bakeñisa kuli lwapila. Lifasi likaba paradaisi. Batu kaufela bakaba ni lico ni  mandu amande. Batu bakaba ni sishemo, isiñi baba lunya kamba ba mifilifili. Lifolofolo za mwa naheñi halina kulusaba, mi haluna kulisaba.

Batu bakataba hahulu Jehova hakakalisa kuzusa batu babashwile. Lukaamuhela batu ba kwamulaho, babacwale ka Abele, Nuwe, Abrahama, Sara, Mushe, Ruti, Estere, ni Davida. Lukasebeza hamoho ni bona kuli lueze lifasi kuba paradaisi. Nako kaufela lukabanga ni misebezi yeminde ya kueza.

Jehova ubata kuli muyo fumaneha mwa paradaisi. Muka muziba hande hahulu kufita mone muhupulela. Haike luzweleñipili kusutelela ku Jehova zazi ni zazi, ka nako ya cwale mane ni kuya kuile!