Yehowa uvua mulaye ne: ‘Kakuakuikala kabidi madilu, bintu bidi bisama, masama, anyi lufu to. Nenkupule binsonji ku mêsu kuabu. Nebapue malu mabi onso a kale muoyo.’

Yehowa wakateka Adama ne Eva mu budimi bua Edene bua kuikalabu ne disanka ne ditalala. Bavua ne bua kutendelela Tatuabu wa mu diulu ne kuwuja buloba tente ne bana. Adama ne Eva bakabenga kutumikila Yehowa, kadi yeye kavua mushintulule tshivuaye mulongolole nansha kakese. Mu mukanda eu tudi bamone ne: malu onso adi Nzambi ulaya adi akumbana. Bukalenge buende nebututuadile masanka a katshia pa buloba, anu muvuaye mulaye Abalahama.

Mu katupa kîpi emu, Satana, ne bademon bende, ne bantu babi bonso kabakuikalaku to. Muntu yonso udi ne muoyo neatendelele Yehowa. Katuakuikala tusama anyi tufua to. Kadi netuikale tubika dituku dionso ne bukole bua bungi ne disanka dia kuikala ne muoyo.  Buloba nebulue mparadizu. Muntu yonso neapete biakudia bimpe ne nzubu muimpe. Bantu nebikale bena malu mimpe, kabayi tshikisu anyi luonji. Nyama ya tshisuku kayakututshina to, ne tuetu petu katuakuyitshina to.

Nebikale bualu bua disanka dia dikema patuadija Yehowa kubisha bantu ku lufu. Netuakidile bantu ba kale bu mudi: Abele, Noa, Abalahama, Sala, Mose, Luta, Esetê, ne Davidi. Netueleshangane nabu diboko mu mudimu wa divuija buloba ebu mparadizu. Misangu yonso netuikale anu ne midimu ya kuenza idi isankisha.

Yehowa mmusue bua wewe pebe wikalamu. Neufike ku dimumanya mu mishindu iutu kuyi muanji kuelela meji to. Tuikalayi anu tuenda tusemena pabuipi ne Yehowa dituku dionso, mpindieu ne tshiendelele!