Yehova washiika nindi: ‘Hikwakekala cheñi kudila, kuyeña, yikatu hela kufwaku. Nakakombola madilu ejima kumesu awu. Yuma yejima yatama yakunyima akayivulamena.’

Yehova wayishili aAdama naEva mwitempa daEdeni kulonda ashakameña mukuwunda nawa namuzañalu. Ateleleli kudifukulaña kudi Tata yawu wamwiwulu nikwinzesha iseki nawanyana adi kuvwalawu. Adama naEva hiyamwovwahilili Yehovaku, ilaña nkeñelu yindi hiyahimpikiliku. Muwunu mukanda tunamoni netu yuma yejima yashiikañayi Nzambi yamwekanaña. Wanta windi wakaleta yuma yayiwahi nankashi hanu hamaseki neyi chamushiikiliyi Abarahama.

Katataka Satana, andemoni jindi niantu atama ejima ayifumishihu. Antu ejima akekala amomi hayina mpinji akadifukulaña kudi Yehova. Hitwakakataña hela kufwaku. Ilaña, hefuku-hefuku twakahindukaña twakola kumujimba nawa tudi namuzañalu muloña wakwikala amomi.  Iseki dakekala paradisa. Antu ejima akekala nayakuda yayiwahi nimatala amawahi kushakamamu. Antu akekala naluwi, bayi atama nyichima hela amadombuku. Hiyakatuchiinaña kudi anyama amwisañaku, nawa ninetu hitwakayichiinañaku.

Twakazañalala nankashi chakatachikayi Yehova kusañula antu. Twakatambwilaña antu adiñaku kunyima, adi neyi Abeli, Nowa, Abarahama, Sara, Mosi, Luti, Esita niDavidi. Twakazatila nawu hamu hakuwahisha Iseki kwikala paradisa. Mpinji yejima kwakekalaña nyidimu yayivulu yayiwahi yakuzata.

Yehova nakukeña nindi wakekalimu. Wakeluka yuma yayivulu hadi yena niyiwabula kwiluka. Tutwalekihu kuswina chikupu kudi Yehova hefuku-hefuku, chayinu mpinji nihaya nyaaka!