Yehova oolaiherya ariki: ‘Horwa okhalavo winla naari wiicela naari okhwa. Miyaano kinamvuta miithori mmiithoni mwaya. Ichu soonanara sa khalai inamucuwaliwa.’

Yehova aamukuha Atamu ni Eva mu emaca ya Eteni wi ekhaleke mmureceleni. Awo yaahaala omulapelaka Yehova ni osareiha elapo ni anamwane aya. Atamu ni Eva hiyaamwiiwelenle Yehova, nyenya yookhwela ya Yehova hiyaatoroken’ye. Mu liivuru yoola nohoona wi ichu soothene Muluku olaihenryeiye sinnakhwaanela. Omwene awe onahaala oruuha mareeliho veelaponi, ntoko aaroromelinheiye ni Aparahamu.

Moohilekela, Satana ni masololo awe ni yaale aneera ichu soonanara anahaala ovihiwamo. Oothene anahaala omulapelaka Yehova. Hokhalavo wiiceliwa naari okhwa. Nnahaala ovinyaka mahiku oothene nrino ikuru ni ohakalala. Elapo enahaala okhala Parataiso.  Oothene anahaala okhalakano yoolya yaphaama ni okhala oophareleleya. Achu anahaala okhala aphaama nave hokhalavo nlala. Axinama hekhalaka ocai nave hiniwoovaka.

Nnahaala tho ohakalala vaavaa Yehova oneereiye aaviihe achu ookhwa. Nnahaala owaakhela achu akhalai, ntoko Apele, Nowa, Aparahamu, Sara, Mose, Ruthi, Estere ni Tavite. Awo anahaala olapaka wi elapo ekhale Parataiso. Mahiku oothene nnahaala opharaka muteko woohakalaliha.

Yehova onachuna wi mukhale mparataiso. Munarwa mmusuwela phaama mmukhalelo mwahaanyiheryaanyu. Hankooni nimwaacameleke Yehova mahiku oothene, hiihaano ni okhala wookhala!