Jehová okijto: “Xok onias chokistli, tekokojkayotl, kualolistli nion mikilistli. Nikinpopouilis inmixayo. Nochi tlen xkuajli opanok, xok noilnamikis”.

Jehová okintlalijka Adán iuan Eva ipan xochitlalpan Edén ijkon chantiskiaj ika inyojlo niman pakiskiaj. Nonekiya makiueyichiuakan toTajtsin iluikakchane niman makitemiltikan tlaltikpaktli ika inkoneuan. Maski Adán iuan Eva xotetlakamatkej, tlen Jehová yokijtoka kichiuas xonopatlak. Ipan yejuin amoxtli yotikitakej ika nochi tlen Jehová kijtoua, nochipa nochiua. ToTajtsin iTekiuajyo kuajkuis miyek tlateochiualistin ipan tlaltikpaktli ijkon ken okijli Abrahán kichiuas.

Sa achijtsin poliui ika Satanás, xkuakualtin espíritus niman tlaltikpakchanejkej akin xkuakualtin popoliuiskej. Nochimej san Jehová kiueyichiuaskej. Xok tikualoskej nion timikiskej. Mojmostla tikpiyaskej miyek chikaualistli niman tipakiskej pampa tiyoltokej.  Tlaltikpaktli nochiuas se xochitlalpan. Nochimej kipiyaskej tlen kikuaskej niman kampa chantiskej. Tlaltikpakchanejkej kipiyaskej kuajli inyojlo, xok tlauelejkej yeskej nion xok tetlajyouiltiskej. Yolkamej xtechmakasiskej niman nion tejuamej xtikinmakasiskej.

Melak kualtsin yes ijkuak Jehová kinyolitis tlaltikpakchanejkej. Kuajli tikinseliskej akin yeuejkaui onenkej ken Abel, Noé, Abrahán, Sara, Moisés, Rut, Ester niman David. Yejuamej techpaleuiskej tijkuepaskej tlaltikpaktli se xochitlalpan. Nochipa onias tekitl tlen melak tikuelitaskej tikchiuaskej.

Jehová kineki ompa xnemi. Tejua kuajli tikixmatis Jehová xijkon ken aman tikixmati. Mojmostla matiknisiuikan Jehová. Ijkon matikchiuakan, ¡aman niman nochipa!