Go na le dilo tše dibotse tšeo Jehofa a re tshepišitšego tšona. Jehofa o re nakong e tlago ‘batho ba ka se sa lla, ba ka se sa kwa bohloko, ba ka se sa babja, e bile ba ka se sa hwa.’ Le gona o re o ‘tlo phumola megokgo ka moka mahlong a bona. Dilo ka moka tše mpe tša gona bjale di ka se sa ba gona.’

Mathomong ge Jehofa a be a bopa Adama le Efa gomme a ba bea serapeng sa Edene, o be a nyaka gore ba phele ka khutšo le ka lethabo. Ka ge e be e le Tatago bona, o be a nyaka gore ba mo rapele le go tlatša lefase ka bana ba bona. Adama le Efa ba ile ba se kwe Jehofa, eupša morero wa Jehofa wa mathomong ga se wa fetoga. Ka pukung ye, re bone gore dilo ka moka tšeo Jehofa a di tshepišago di a direga. Mmušo wa gagwe o tlo re direla dilo tše dibotse mo lefaseng, ka ge a ile a tshepiša Aborahama.

Kgauswinyane, Modimo o tlo fediša Sathane, batemona ba gagwe le batho ka moka ba babe. Mo lefaseng go tlo šala feela batho bao ba kwago Jehofa. Re ka se sa babja goba go hwa. Go e na le moo, re tlo  phela gabotse le go thaba letšatši le lengwe le lengwe. Lefase ka moka e tlo ba paradeise. Batho ka moka ba tlo ba le dijo tše dibose le dintlo tše dibotse. Ba tlo ratana, ba swarana gabotse le go thušana. Diphoofolo di ka se sa re tšhaba, gomme le rena re ka se sa di tšhaba.

Re tlo thaba le go feta ge Jehofa a thoma go tsoša bahu. Re tlo amogela batho bao ba hwilego kgale, e lego batho ba go swana le Abele, Noa, Aborahama, Sara, Moshe, Ruthe, Esitere le Dafida. Re tlo šoma le bona go fetoša lefase gore e be paradeise. Le gona re tlo dula re na le mošomo o montši wo o kgahlišago.

Jehofa o nyaka gore le wena o tle o phele paradeiseng. Ka nako yeo, o tlo ithuta dilo tše dintši ka yena tšeo gona bjale o sa di tsebego. Ka gona, anke ga bjale re batamele kgauswi kudu le Jehofa letšatši le lengwe le le lengwe. Ge re ka dira bjalo, re tla ba bagwera ba gagwe ka mo go sa felego!