Gyihova ɛbɔ ɛwɔkɛ kɛ: ‘Ɛzunlɛ, nyane, anwodolɛ anzɛɛ ewule bavi ɛkɛ. Mebakyikyi bɛ nye anwo monle kɔsɔɔti. Bɛnrɛhakye ninyɛne dɛba ne mɔɔ ɛnle kpalɛ la bieko.’

Gyihova maanle Adam nee Yive dɛnlanle Yidɛn tola ne anu wɔ anzodwolɛ nee anyelielɛ nu. Ɛnee ɔwɔ kɛ bɛsonle bɛ anwuma Selɛ ne na bɛwo bɛmaa azɛlɛ ye yi. Adam nee Yive andie Gyihova noko ye bodane ne angakyi. Yɛnwu ye wɔ buluku ɛhye anu kɛ, debie biala mɔɔ Nyamenle ɛbɔ nwolɛ ɛwɔkɛ la ba nu. Ye Belemgbunlililɛ ne bamaa nyilalɛ dɔɔnwo ara azɛlɛ ye azo kɛ mɔɔ ɔbɔle Ebileham ɛwɔkɛ la.

Ɔnrɛhyɛ Seetan nee ye sunsum ɛtane ne mɔ yɛɛ ɛtanevolɛma kɔsɔɔti bavi ɛkɛ. Awie biala mɔɔ de aze la bazonle Gyihova. Yɛ nwo ɛnrɛdo yɛ yɛɛ yɛnrɛwu. Emomu, alehyenlɛ biala mɔɔ yɛbadwazo la, ɛnee yɛlɛ anwosesebɛ na yɛ nye die kɛ yɛde aze a. Azɛlɛ ye bayɛ paladaese. Awie  biala bali aleɛ kpalɛ na yeadɛnla sua mɔɔ banebɔlɛ wɔ ɛkɛ la anu. Menli ati ɛnrɛyɛ se yɛɛ bɛnrɛyɛ amumuyɛ. Yɛnrɛzulo nane mɔɔ anwo yɛ ɛzulolɛ la yɛɛ bɛnrɛzulo yɛ.

Saa Gyihova bɔ ɔ bo kɛ ɔdwazo mowuamra a, ɔbayɛ anyelielɛ kpole. Yɛbayɛ menli mɔɔ dɛnlanle aze tete ne mɔɔ bie a le Ebɛle, Nowa, Ebileham, Sɛla, Mosisi, Wulutu, Ɛseta, nee Devidi la akoaba. Bɛbaboka yɛ nwo bɛamaa yɛayɛ Azɛlɛ ye paladaese. Yɛbayɛ gyima dɔɔnwo mɔɔ yɛ anyelielɛ la dahuu.

Gyihova kulo kɛ ɛkɔ bie. Ɛbanwu ye kpalɛ wɔadɛla kɛ mɔɔ ɛsuzu la. Bɛmaa yɛbikye Gyihova kpalɛ alehyenlɛ biala, ɛnɛ nee mekɛ mɔɔ ɛnlɛ awieleɛ!