Jehová Diosqa nerqa: “Manaña waqay, nanay, onqoykuna, wañuy ima kanqachu. Ñawisninkumanta tukuy waqayta pichasaj. Chay ñaupaj kaj imasqa chinkaponqa”, nispa.

Diosqa Adantawan Evatawan Edén huertaman churarqa kusisqas kausakunankupaj, payta yupaychanankupaj, wawasninkutaj kay jallpʼaman juntʼanankupaj. Paykuna Diosta mana kasukojtinkupis, Diosqa imatachus runaspaj ruwayta munasqanta mana cambianchu. Kay libropeqa rikorqanchej Diospa nisqan juntʼakusqantapuni. Abrahanman Dios nerqa jinataj, Diospa Gobiernonqa sumaj bendicionesta apamonqa.

Tumpamantawan Satanás, supaykuna, sajra runas ima chinkanqanku. Tukuytaj Jehová Diosllata yupaychasun. Niñataj onqosunchu, nitaj wañusunchu, astawanpis sapa día kusisqas,  kallpayojtaj rijchʼarisun. Jallpʼanchejqa uj paraisoman tukonqa. Tukuypis wasiyoj kasun, nitaj mikhunapis pisiwasunchu. Runas kʼachas kanqanku, phiña animalestapis niña manchikusunchu, nitaj paykunapis manchikuwasunchu.

May sumajpuni kanqa Jehová Dios wañusqasta kausarichejtin. Abel, Noé, Abrahán, Sara, Moisés, Rut, Ester, David ima kausarimonqanku. Paykunaqa yanapawasun kay jallpʼata uj paraisoman tukuchinapaj. Chaypitaj sumaj imasta ruwallasunpuni.

Jehová Diosqa munan paraisopi kausakunanchejta. Chaypitaj Diosmanta astawan yachakusun. Chayrayku kunan Jehová Diosman astawan qayllaykunapaj kallpachakuna.