Jehová Diosca, ‘cancunapaj ñahuicunamantaca tucui huiquitami pꞌichasha. Huañuipish huacaipish nanaipish mana tiyangachu. Ñaupa llaquicunataca ña mana yuyaringuichijchu’ nircami.

Jehová Diosca Adanta Evataca cushilla causachunmi Edén huertapi churarca. Paicunaca Diosllatami adorana carca. Cai allpapipish huahuacunata charishpami jundarina carca. Pero Adanpish Evapish Diosta mana cazurcacunachu. Chashna jahuapish Diosca paipaj munaita mana cambiashcachu. Cai libropica Diosca pai nishcacunata siempre pajtachij cashcatami yachashcanchij. Cai allpata Jesús mandacujpica sumaj bendicioncunatami charishun. Chashnami Abrahamman cusha nishcata Diosca pajtachinga.

Ñallami Diablopish demoniocunapish millai gentecunapish chꞌingaringacuna. Chaipica tucuicunami Diosllata adorashun. Ña mana ungushunchu, mana huañushunchu. Ashtahuancarin imata  rurangapajpish punllantami achca fuerzata charishun. Chaimantami cushilla sintirishun. Chashnallataj mishqui micunatami micushun, alli huasicunatami charishun. Llaquichijcunapish mana tiyangachu. Tucuicunami allicuna cashun. Sacha animalcunatapish ña mana manchashunchu. Ashtahuancarin tandallami causashun. Cai allpaca shuj paraisomi tucunga.

Huañushcacunata Jehová causachi callarijpica yallitajmi cushicushun. Abel, Noé, Abraham, Sara, Moisés, Rut, Ester, Davidpish causarijpica cushicushpami chasquishun. Paicunaca cai allpa shuj paraíso tucuchunmi ayudanga. Shinallataj tucui laya sumaj trabajocunatami rurashun.

Yaya Diosca canpish paraisopi causachunmi munan. Chaipica Diosmantami ashtahuan yachashun. Chaimanta, cada punlla Diospajman ashtahuan cꞌuchuyashunchij.