Jehova Diosmi niwarqanchik: “Runakunapa wiqintam pichasaq, manañam kanqachu unquypas, waqaypas nitaq wañuypas. Tukuy chaykunaqa qunqasqañam kanqa”, nispa.

Adantawan Evataqa kusisqa kawsakunankupaqmi kuyayllapaq huertaman churarqa. Paykunaqa Jehova Diosllatam yupaychananku karqa hinaspapas miranankum karqa. Ichaqa Diostam qipancharurqaku, chaywanpas Diosqa hinallam munan kusisqa kawsakunanchikta. Kay qillqapim yacharunchik imapas nisqankunata Jehova Dios ruwananmanta. Kay allpa pachata kamachimuptinmi Abrahanman nisqanpas ruwakunqa, chayqa ancha kusikunapaqmi kanqa.

Satanaswan demonionkunaqa chaynataq mana allin runakunaqa chinkanqakuñam. Chaymi lliw runakunaqa Jehova Diosllataña yupaychasun. Manañam unqusunñachu nitaq wañusunñachu aswanqa sumaq huertapiñam kusisqa kawsakusun. Miski-miskillañam mikunanchikpas  kakunqa, wasinchikpas kuyayllapaqmi kanqa. Allin runakunallañam kawsanqaku, purun animalkunapas manañam imanawasunchu.

¡Mayna kusikunapaqchá kanqa wañuqkuna kawsarimusqanqa! Chaypiqa tupaykusunmi Abelwan, Noeywan, Abrahanwan, Sarawan, Moiseswan, Rutwan, Esterwan hinaspa Davidwanpas. Paykunawan kuskam kay allpa pachata huertayachisun, tukuy imatapas kusikuyllawanñam ruwasun.

Jehova Diosqa munanmi qampas chay sumaqllaña huertapi kawsakunaykita. Chaypim Jehova Diosmanta astawanraq yachasun. Chaynaqa, ¡kunanmantapachayá astawan kallpanchakusun Jehova Diosman astawan asuykunapaq!