Jehová Diosca nircami: Gentecunapa ‘ñavimandaca tucuilla viquitami fichasha. Huañuipash, huacaipash, llaquipash, nanaipash, na ashtahuan tiangachu. Punda ima tiashcapash illangami’ nishpa.

Adanda, Evataca jardín de Edenbi cushilla, casilla causachunmi Jehová Diosca churarca. Paicunaca Jehová Diosta adorashpa, cai alpapi huahuacunata charishpami causana carca. Shinapash Adanbash Evapash Jehovataca na cazurcachu. Paicuna na cazushca cajpipash Jehová Diosca paipa munaita pactachingapachami. Chaitaca cai libropimi ña yachajushcanchi. Diospa Reino cai alpata mandajpimi tucuicuna ali causashun. Shinami Abrahanman imata cusha nishcapash pactaringa.

Ñallami Diablopash, ayacunapash, nali gentecunapash tucuchi tucunga. Chaimi tucui gentecuna Jehová Diostalla adoranga. Chai punllacunapica ni ungüita ñana charishunllu. Ni huañuitapash na huañushunllu. Chaipa randica sano, shinlli, cushillami causanajushun. Cai  Alpaca shuj juyailla paraisomi tucunga. Tucuicunami ali huasicunata, ashtaca micunacunata charishun. Chaipica millai gentecunapash ñana tiangachu. Sacha animalcunatapash ñana manllashunllu.

Huañushcacunata Jehová Dios causachijpica ninandami cushijushun. Punda tiempopi causashca Abel, Noé, Abrahán, Sara, Moisés, Rut, Ester, Davidpash causarijpica paicunataca cushijushpami chasquishun. Paicunapashmi cai alpa shuj paraíso tucuchun ayudanga. Chaipica tucuicunami imagutapash rurashun.

Jehová Diosca quiquinbash paraíso alpagupi causachunmi munan. Chaipica Jehová Diosmanda ashtahuanmi yachajushun. Chaimandami cunanmandallata Jehová Diosman ashtahuan quimirina capanchi.