О Јехова ветинѓа: „Нане повише те овел ројбе, дукха, насвалипе, ни мерибе. Ка косав о асва таро е манушенгере јакхја. Никој нане те сетинел пе ко лошна буќа со сине поангле“.

Ко почеток, о Јехова керѓа е Адамеске хем е Еваке јекх рајско градина те шај те живинен среќно хем ко мир. Ола ваљани сине те служинен е Девлеске хем те пхерен и Пхув чхавенцар. О Адам хем и Ева на шунѓе е Јехова, ама лескири намера на менинѓа пе. Ко акава лил дикхлем кај са со ветинѓа о Девел исполнинѓа пе. Кеда ка владинел е Девлескоро Царство ки Пхув, ка анел баре благословија, сар со ветинѓа е Авраамеске.

Панда хари, о Сатана, о демонија хем о лошна мануша нане више те овен. Тегани сарине ка служинен само е Јеховаске. Нане те ова насвале хем нане те мера. Ка овел амен бари сила хем ка радујна амен со сием џивде секова диве. И Пхув ка овел рај.  Секој ка овел ле шукар хајбе хем пло кхер. О мануша нане те овен лошна хем насилна, него шукар хем љубезна. Нане те дара таро дива животне, ама ола да нане те даран амендар.

Ка овел аменге бут интересно кеда о Јехова ка почминел те воскреснинел е мулен. Тегани ка шај те запознајна е манушен таро пурано време, сар сој о Авел, о Ное, о Авраам, и Сара, о Мојсеј, и Рут, и Естира хем о Давид. Заедно ленцар, ка кера и Пхув те овел рај. Ка овен бут интересна буќа со ка кера лен секова диве.

О Јехова мангела ту да те ове адатхе. Тегани ка шај те пенџаре ле панда пошукар. Адалеске, те ова са попаше амала е Јеховаја, акана хем засекогаш!