O Jehova obećindža: „Više na ka ovel rojbe, dukha, nabormipa, ni o meribe više na ka ovel. Ka kosav svako asvi kotar oljenge jačha. Sa o lošna buča kola hine angljeder više na ka oven.“

O Jehova čhivdža e Adame hem e Eva ko edensko vrt te živinen ko mir hem te oven bahtalje. On valjandže te služinen peklje nebesko Dadese hem te pheren i phuv oljenge čhavencar. O Adam hem i Eva na šundže e Devlje, ama oljesi namera na menindža pe. Ki akija knjiga dikhljam so sa e Jehovase lafija uvek ispuninena pe. Sar so o Jehova obećindža e Avrahamese, prekalo oljeso Kraljevstvo celo phuv ka ovel blagoslovimi.

Pana hari, o Beng, oljese demonja hem sa o lošna manuša više na ka postojinen. Tegani sa soj tano dživdo ka slavini e Jehova hem samo ljese ka služini. Na ka ova naborme hem na ka mera. Svako dive ka ovel amen volja te ušta hem ka ova bahtalje so hijam  dživde. Celo phuv ka ovel raj. Sare ka ovel ljen so te han hem kaj te živinen. O manuša ka oven šukar jekh jekheja hem na ka oven nasilna. Na ka dara ando divlja životinje.

But ka ova bahtalje ked o Jehova ka počmini te uskrsnini e manušen. Jedva adžičeraja te dikha e manušen ando purano vreme sar soj tane o Avelj, o Noje, o Avraham, i Sara, o Mojsije, i Ruta, i Jestira, hem o David. On ka pomožinen amen te čera i phuv te ovel raj. Uvek ka čera buča kola ka anen amendže bahtaljipe.

O Jehova mangela tu te ove odothe. Akana našti ni te zamisline so tegani ka sikljove ando Jehova. Odoljese, svako dive čer sa so šaj te ove paše e Jehovaja hem akana hem zauvek!