Na folafola mai e Ieova: ʻE lē toe iai se tagiauē, tigā, maʻi, po o le oti. Ou te soloiesea loimata uma i o latou mata. E lē toe manatua mea leaga uma sa iai.’

Na tuu e Ieova Atamu ma Eva i le faatoʻaga o Etena e nonofo ai ma le filemu ma le fiafia. Sa tatau ona la tapuaʻi atu i lo la Tamā i le lagi ma faatumu le lalolagi i a la fanau. Na lē usiusitaʻi Atamu ma Eva iā Ieova, ae e leʻi suia ai lona finagalo. Ua tatou aʻoaʻoina mai i lenei tusi o mea uma e folafola mai e le Atua e taunuu. O le a aumaia e lona Malo faamanuiaga matagofie i le lalolagi, e pei ona ia folafola mai iā Aperaamo.

E lē o toe umi ona aveesea lea o Satani, ana temoni, ma tagata leaga uma. O i latou uma o le a faasaoina o le a tapuaʻi iā Ieova. O le a tatou lē toe mamaʻi pe toe feoti. Nai lo o lea, o le a tatou feala aʻe i aso taʻitasi ma lagona le malosi o le tino, faapea le fiafia ona  ua tatou maua le ola. O le a avea le lalolagi ma parataiso. O le a maua e tagata uma taumafa lelei ma fale saogalemu. O le a agalelei tagata, ae e lē toe sauā pe amioleaga. O le a lalata manufeʻai iā i tatou, ma e tatou te lē toe fefefe foʻi i manufeʻai.

E tatou te lagona le fiafia i le taimi e amata ai ona toe faatutū e Ieova tagata. O le a tatou faafeiloaʻia tagata mai i aso ua mavae, e pei o Apelu, Noa, Aperaamo, Sara, Mose, Ruta, Eseta, ma Tavita. O le a latou galulue faatasi ma i tatou i le galueaʻiina o le lalolagi paneta ina ia avea o se parataiso. O le a tele pea galuega mananaia e fai.

E finagalo Ieova ina ia e iai i inā. O le a e iloa ai Ieova i ni auala e te leʻi mafaufau i ai muamua. Seʻi o tatou mafuta vavalalata atu pea iā Ieova i aso taʻitasi, i le taimi nei seʻia oo i le faavavau!