Yehuwa nẹ̌diandi, ’Su tempo mahi, seng tawẹ apa taumata sumangị, masakị, arau mate. Iạ sarung měngěmụ ěllo mata wọu matang i sire. Kěbị barang dal᷊akị nariadi kangerẹ seng tawe tahěndungang.’

Yehuwa někoạ Taman Eden gunang i Adam dingangi Hawa tadeạu i sire botonge měbiahẹ̌ mararame dingangu mal᷊uasẹ̌. I sire harusẹ̌ maněmbah si Amang i sire su sorga kụ měmenẹ dunia dingangu anạ i sire. Adam dingangi Hawa tawe timuhụ si Yehuwa, katewe kapulu-Ne tawe nẹ̌bal᷊ui. Su bukẹ̌ ini, i kitẹ nakasilo dianding Mawu ene tatapẹ̌ nikoạ’E. Kere diandi-Ne si Abraham, Kararatuangu Mawu sarung makarěntang al᷊amatẹ̌ su dunia.

Seng mal᷊ighạ tempone Setang, tumatol᷊ene, dingangu kěbị taumata dal᷊akị mawinasa. Kěbị taumata apang nasal᷊amatẹ̌ sarung maněmbah si Yehuwa. Su tempo mahi, i kitẹ seng tawe masakị arau lai mate. Sabang mẹ̌bangung mal᷊ukadẹ̌ badang i kitẹ matoghasẹ̌ dingangu i kitẹ lai mal᷊uasẹ̌. Dunia sarung makoạ firdaus. Kěbị taumata sarung  piạ kaěng dingangu wal᷊e mapaelẹ̌ gunang pẹ̌tanakeng. Kěbị taumata mapia, kụ tawe měndariha taumata wal᷊inẹ. Binatang tawe matakụ si kitẹ, kụ i kitẹ lai seng tawe matakụ si sire.

Su tempong i Yehuwa saụ mapakawiahẹ̌ taumata nate, i kitẹ kěbị tantu sěbạe mal᷊uasẹ̌. I kitẹ sarung měněnsomahẹ̌ taumata apang bọu něbiahẹ̌ su tempong tamai, kere i Habel, Noakẹ̌, Abraham, Sara, Musa, Rut, Ester, dingangi Daud. I sire sarung tumol᷊e měkoạ dunia mariadi firdaus. Sarung piạ lawọ hal᷊ẹ̌ makal᷊uasẹ̌.

Yehuwa mapulu i kau ene sene. Su ěllo mahi, i kau sarung makasingkạ limembong mal᷊awọ soal i Sie dingangu cara bědang tawe napikirẹ̌ si kau. Mahịe i kitẹ mědal᷊ahapị mapia dingangi Yehuwa ěllo-ěllo, měnětạ bọu orasẹ̌ ini dingangu sarang karěngụe!