Jeobá niʼthí maʼni rígi̱: “Ní xúmbiyaʼ itháan, ní xárígá gaʼkhu, nandii ní má rí makháñala. Mani kaʼwi̱i̱ xúgíʼ iyoʼ idala. Ni xarmáʼáan a̱jkia̱la rí nirígá ginii”.

Jeobá nixnúu Adán ga̱jma̱a̱ Eva rí makuwá náa ixi̱ ri̱ʼi̱ Edén mu makuwa tsímáá ga̱jma̱a̱ májánʼ. Ndiyóoʼ rí mbuyamajkuíí Anu̱ún bi̱ xtáa mekhuíí ga̱jma̱a̱ rí muguaʼdiin mbaʼin e̱ji̱n mu muni majtíin náa tsu̱du̱u̱ ku̱ba̱ʼ. Adán ga̱jma̱a̱ Eva túnimbu̱ún rí niʼthí Jeobá, mú rí nindoo maʼni taxtiʼkhuu. Náa libro rígi̱ ndiʼyáá rí Dios naʼnimbánuu má xúʼko̱ rí naʼthí maʼni. Reino ndrígóo ma̱ʼkha̱ kayóo mbaʼa rí mitsaan náa tsu̱du̱u̱ ku̱ba̱ʼ, ga̱jma̱a̱ xúʼko̱ gaʼnimbánuu rí nikudaminaʼ náa Abrahán.

Mbá nacha̱ ní xáxtáa Satanás gajmíi̱n xa̱bu̱ wéñiʼ ní má xa̱bu̱ bi̱ nuni dí ra̱májánʼ. Xúgíʼ numbaaʼ mbuyamajkuíí Jeobá. Nánguá gáʼniulú nandii ní xákháñulúʼ, ikhú muguaxunʼ mámbá mbiʼi muguaʼdáá itháan tsiakii ga̱jma̱a̱ makuwáanʼ gagi numuu rí nduʼya. Ku̱ba̱ʼ maʼni̱i̱ mitsaan.  Xúgiáanʼ muguaʼdáá ganitsu miʼtsí ga̱jma̱a̱ guʼwá májánʼ. Xákúwi̱i̱n xa̱bu̱ bi̱ ra̱míjínʼ ni má bi̱ najmangunʼ wéñuʼ, xúgínʼ mani̱ndxu̱ún míjínʼ. Xujkhú xáná ní xámiñuun kuyulúʼ, ní má ikháanʼ nánguá mamiñúlú kuʼñúún.

Ra̱ʼkhá tháán gagi gáʼni índo̱ Jeobá gági̱ʼdu̱u̱ makuxiín xa̱bu̱ bi̱ nikháñun. Mundríguíin májánʼ xa̱bu̱ bi̱ nikuwa nákha wajyúúʼ xóo Abel, Noé, Abrahán, Sara, Moisés, Rut, Ester ga̱jma̱a̱ David. Ikhiin mumbayúlú mu muʼni̱i̱ mitsaan ku̱ba̱ʼ. Marigá má xúʼko̱ mbaʼa enii rí naʼgui̱i̱ rí mu̱ʼni̱.

Jeobá nandoo rí ikháánʼ maraxtaa náa Ku̱ba̱ʼ mitsaan. Ikhí majmañulúʼ mbaʼa enii ga̱jma̱a̱ numuu Dios rí nditháan túndxaʼwa̱míjna̱ majmañulúʼ. Ikha jngó, ¡guxuʼmamíjná mámbá mbiʼi náa Jeobá, xúgi̱ ga̱jma̱a̱ kámuu mbiʼi!