Jeová promete: ‘Ema sei la tanis tan, la hetan terus, moras ka mate. Haʼu sei hamaran matan-been hotu husi sira-nia matan. Sira sei la hanoin tan kona-ba buat aat hotu.’

Jeová halo jardín Eden ba Adão no Eva atu sira bele moris ho dame no kontente. Sira sei adora sira-nia Aman iha lalehan no halo nakonu mundu ho sira-nia oan. Adão no Eva kontra Jeová, maski nuneʼe Jeová nia hakarak nunka troka. Iha livru neʼe, ita aprende ona katak Maromak sempre kumpre ninia promesa. Maromak nia Ukun sei lori buat diʼak oioin ba mundu hanesan nia promete ona ba Abraão.

Lakleur tan, Satanás, anju aat sira, no mós ema aat hotu sei la iha ona. Ema hotu neʼebé moris sei adora Jeová. Ita sei la moras no la mate tan. Loron-loron ita sei sente forsa no  kontente. Mundu sei sai paraízu. Ema hotu sei iha hahán no hela-fatin neʼebé diʼak. Ema hotu sei hatudu laran-diʼak, no la iha violénsia. Animál fuik sira sei la taʼuk ita, no ita mós sei la taʼuk sira.

Ema hotu sei sente kontente kuandu Jeová halo ema mate moris hiʼas. Ita sei fó benvindu ba ema husi tempu uluk, hanesan Abel, Noé, Abraão, Sara, Moisés, Rute, Ester, no David. Sira mós sei serbisu atu halo mundu sai paraízu. Sei iha serbisu barak neʼebé ita bele halo ho kontente.

Jeová hakarak ó atu moris iha neʼebá. Ó sei koñese liután nia iha dalan neʼebé ó nunka imajina. Mai ita hakbesik liután ba Jeová loron-loron, agora, no ba nafatin!