Izao ty nampitamàe i Jehovah: ‘Tsy hisy sasa ty tagny, ty fijaleagne, ty aretegne naho ty fate. Hoforako ty ranomaso iaby. Ho haligno iaby ze raha raty taloha.’

Natao i Jehovah tamy i tete i Edenay ao ty Adama naho i Eva, satria tea’e ho sambatse. Toko’e ho nivavake tamy i Rae iareo an-dagnitse agney naho hiterake hameno ty tane toy ty Adama naho i Eva, faie tsy nankatò i Jehovah iareo. Ndra tie eo izay, le tsy niova ty raha tea i Jehovah hatao. Treantikagne tamy ty boke toy ato fa avy eo iaby ze raha ampitamae’e. Hinday raha soa maro an-tane etoy i Fanjakà’ey, fa izay ty nampitamàe’e i Abrahama.

Kede sisa, le tsy hisy sasa ty Satana, i demonia’e rey naho ty ndaty raty fagnahy. Hanompo i Jehovah ty ndaty an-tane etoy. Tsy harare ndra ho mate sasa tikagne, fa ho falefale lalandava sady  havitribitrike isake ty mifoha. Hanjare paradisa ty tane toy. Hanagne hanegne maro naho tragno fanjaka o ndatio. Ho soa fagnahy o ndatio fa tsy hasiake ndra ho tea aly sasa. Tsy hatahotse o bibio sasa tikagne sady tsy hatahotse antikagne ka o bibio.

Ho fale tika naho fa hovelome i Jehovah indraike ty mate. Hotreantika ty Abela, i Noa, i Abrahama, i Saraha, i Mosesy, i Rota, i Estera naho i Davida. Hifagnampe amantika iareo mba hagnova ty tane toy ho paradisa. Hisy asa fanjaka ho azontikagne atao avao ty amy izay.

Teà i Jehovah ho amy i Paradisay ao rehe. Ho maro ty raha ho fanta’o miomba aze amy izay. Mikezaha areke ho nama i Jehovah isan’andro manomboke amy izao sady hatrake agne.