Yehova tôndo zwa ér: ‘Kwagh môm u nan or mliam ma vaan, shin ishimavihin, shin angev shin ku kpaa, una va kera lu ga. Me ese ior cii mliam sha ishi kera. Vea kera umbur akaavihin a yange er ve la ga.’

Yehova yange ver Adam man Ifa ken sule u Eden ér ve lu ken bem shi i saan ve iyol. Shi lu u vea civir Ter ve u sha la shi vea mar ônov vea iv tar. Kpa Adam man Ifa va hemba Yehova ato, nahan cii kpa awashima u Yehova yô, gema kposo ga. Se time ken takerada ne se nenge er hanma kwagh u Aôndo a tende zwa u eren cii, ka a er un vough yô. Tartor na ua va er akaa a doon tsung sha tar, vough er yange tôndo zwa a Aberaham nahan.

Ica a gba ga tsô, a tim Satan man azôv a na kua ior mba ve eren aferakaa la cii. A mase shin mbacivir Yehova tseegh vea lu uma sha tar ye. Se kera gbaan angev ga shi se kpeen ga. Kpa hanma iyange yô, se nder se lu gbang gbang shi i saan se iyol er se lu uma yô. Tar ua hingir paradiso. Hanmaor nana lu a kwaghyan u dedoo kua ya u injaa. Ior vea eren kwagh a mbagenev kundu kundu, vea wa tswam ga shi vea eren ifer ga. Annyamev  mba ken toho vea kera cian se ga, shi se kpa se cian mba ve cier se iyol hegen la ga.

Shighe u Yehova una va hii u nderen ior shin ku la, a saan se iyol kpishi. Se nenge a ior mba yange ve kpe sha ayange a tsuaa la, se lu sughun ve er ve nder shin ku yô; a lu ior er Abel, Noa, Aberaham, Sara, Mose, Rutu, Eseter, man Davidi nahan. Vea er tom a vese imôngo u geman Tar u se tema sha u ne hingir paradiso. Se luun a ityom i dedoo kpishi i eren hanma shighe cii.

Yehova soo ér we kpa u va lu ken paradiso. Aluer u va ngu ker yô, u fa un sha igbenda igen i yange u vande fan un sha mi ga yô. Yô, se za hemen u kporom ikyua a Aôndo hanma iyange cii, hii hegen je zan zan gbem sha won!