Naʻe palōmesi ʻa Sihova: ‘ʻE ʻikai ke toe ʻi ai ha tangi, langa, puke, pe mate. Te u holoholo ʻa e loʻimata kotoa pē mei honau matá. ʻE ngalo ʻa e ngaahi meʻa kovi kotoa pē ʻi he kuohilí.’

Naʻe tuku ʻe Sihova ʻa ʻĀtama mo ʻIvi ʻi he ngoue ʻo ʻĪtení ke na nofo ai ʻi he melino mo e fiefia. Naʻe fiemaʻu ke na lotu ki heʻena Tamai fakahēvaní pea fakafonu ʻa e māmaní ʻaki ʻena fānaú. Naʻe talangataʻa ʻa ʻĀtama mo ʻIvi kia Sihova, ka naʻe ʻikai ʻaupito ke liliu ai ʻene taumuʻá. ʻI he tohí ni kuo tau sio ai ko e meʻa kotoa pē ʻoku palōmesi mai ʻe he ʻOtuá ʻoku hoko moʻoni. ʻE ʻomai ʻe hono Puleʻangá ʻa e ngaahi tāpuaki fakaʻofoʻofa ki he māmaní, hangē pē ko ʻene palōmesi kia ʻĒpalahamé.

Kuo vavé ni ke puli atu ʻa Sētane, ko ʻene fanga tēmenioó, mo e kakai koví kotoa. ʻE lotu ʻa e tokotaha kotoa pē ʻoku moʻuí kia Sihova. Heʻikai ke tau puke pe mate. Ka, te tau ʻā hake ʻi he ʻaho taki taha ʻoku lahi hotau iví pea tau fiefia ʻi he moʻuí. ʻE hoko ʻa e māmaní ko ha palataisi. ʻE maʻu ʻe he tokotaha kotoa ʻa e meʻakai lelei mo e ngaahi ʻapi ʻoku malu. ʻE anga-lelei ʻa e kakaí, ʻo ʻikai te nau anga-fakamamahi pe  fakamālohi. Heʻikai ke ilifia ʻiate kitautolu ʻa e fanga manu fekaí, pea heʻikai ke tau ilifia ʻiate kinautolu.

ʻE fakafiefia ʻaupito ʻa e taimi ʻe kamata ke fokotuʻu hake ai ʻe Sihova ʻa e kakaí. Te tau talitali lelei ʻa e kakai mei he kuohilí, hangē ko ʻĒpeli, Noa, ʻĒpalahame, Sela, Mōsese, Lute, ʻĒseta, pea mo Tēvita. Te nau kau mo kitautolu ʻi hono ngaohi ʻa e foʻi palanite ko Māmaní ke hoko ko ha palataisi. ʻE lahi maʻu pē ʻa e ngaahi ngāue fakafiefia ke faí.

ʻOku fiemaʻu ʻe Sihova ke ke ʻi ai. Te ke hoko ʻo ʻiloʻi ia ʻi he ngaahi founga naʻe ʻikai ʻaupito te ke fakakaukau atu ki ai. Tau ʻunuʻunu ke ofi ange kia Sihova ʻi he ʻaho kotoa pē, ʻi he taimí ni pea taʻengata!