Jehovha tumbiside khuye: ‘Vathu kha va na nga liya, kha va na ngapwa guvbisa, kha va na nga dwala, ne kha va na ngafa gambe. Nyi na bavbula marongo yatshavbo dzikhovbeni dzawe. Silo satshavbo nya guvivbe kha si na nga dundrugwa gambe.’

Jehovha a di vegide Adhamu ni Evha thembweni ga Edheni gasi va vbanya umo khu gurula na va tsakide. Va di yede gu khozeya Papayi wawe wa ndzadzini va bwe va tadza mafu khu sanana sawe. Adhamu ni Evha va di diga gu engisa Jehovha. Ganiolu, esi Jehovha a nga ba a vbweta gu gira gupheyani kha sa vbindrugedza. Omu nya libhuku leli, hi wonide gu khethu satshavbo esi Nungungulu a tumbisago si ngu girega. Jehovha tumbiside Abrahama gu khuye a na resa makategwa nyo tsakise ngudzu mafuni. Mufumo waye wu na resa makategwa yoyo a tumbisidego.

Nugunugu, Sathane, madhimoni yaye ni vathu vatshavbo nya guvivbe va na fuviswa. Vatshavbo va na gu ba va vbanya khu tepo yoyo, va na khozeya Jehovha. Kha hi na nga dwala ne gufa. Tshigu ni tshigu hi na wuga na hi  tiyide ni gu tsaka khu womi. Mafu ma na khala paradhesi. Vathu vatshavbo va na ba vari ni guhodza nya gwadi ni dzinyumba nya dzadi. Vathu va na ba gira silo nya sadi, kha va na nga manega ni litsoro ne kha va na nga tshanisa vambe. Sirengo nya likhabi kha si na nga hi thava, nigu anethu kha hi na nga si thava.

Tepo Jehovha a na pheyago gu wusa ava vafudego, si na tsakisa ngudzu. Hi na hoyozeya vathu va vbanyidego gale, nya nga Abheli, Nowa, Abrahama, Sara, Mosi, Rute, Esiteri ni Dhavhidhe. Va na hi phasa gu vbindrugedza Mafu ma khala paradhesi. Tepo yatshavbo hi na ba hiri ni thumo nyo tsakise.

Jehovha o vbweta gu khuye u manega iyoyo. U na muti gwadi guvbindra edzi u mu tigo khidzo olu. Hongoleni hi simamani gu tiyisa wupari wathu ni Jehovha, a khala pari yathu nya yikhongolo ngudzu tshigu ni tshigu kala gupindruga!