Ja Jyoba skʼapa: «Mixa ojto ajyuk okʼel, mini syajal, mini koʼel chamel sok mini chamelchʼakel. Oj jtakes ja yalel sate. Yibʼanal ja jastik mi lekuk ekʼeli mixa oj julskʼujole».

Ja Jyoba ti yaʼa ja Adán soka Eva bʼa kʼachinubʼ bʼa Edén bʼa oj ajyuke sakʼan gusto sok laman. Sbʼejni oj yaʼteltaye ajyi ja sTate bʼa satkʼinal sok sbʼutʼjel ja luʼum soka yuntikile. Ama ja Adán soka Eva skʼokoweyi ja yabʼal ja Jyoba, pe mini tukbʼeluk ja jas wa skʼana. Ja bʼa libro it kilunejtik ja Dyosi wani xya kʼotuk ja jastik wa skʼapa. Ja sGobyerno ojni yijan tsamalik slekilal ja bʼa luʼumi, sok jach oj kʼotuk ja jas skʼapayi ja Abrahán.

Jelxa mojan ja Satanás, ja spukujik sok ja ixuk winike jel malo mixa oj ajyuke. Kibʼanaltik oj kaʼteltaytik ja Jyoba. Mixa oj maloʼaxukotik sok mixa oj chamkotik. Kʼakʼu kʼakʼu jelxa kip oj kʼekotik sok gustoxta yuja sakʼan ayotiki. Ja luʼumi oj paxuk jun kʼachinubʼ. Ojxa ajyukujtik lekil  waʼelalik sok lekil naʼitsik. Jelxani lek oj sjeʼe ja smodoʼe ja ixuk winik, pes mixa oj ajyuk ja matik jel malo sok ja matik wa xmilwani. Ja kʼakʼal chanteʼik mixa oj xiwuk jmoktik, cha mini ja keʼntiki.

Jelni tsamal juntiro oj abʼxuk yajni ja Jyoba xkʼe ya sakʼwuk ja chamwiniki. Ojni katikyi lekil sjulelale ja ixuk winik bʼa najate jastal ja Abel, Noé, Abrahán, Sara, Moisés, Rut, Ester sok David. Ja yeʼnle oj skoltayotike bʼa yajel paxuk jun kʼachinubʼ ja luʼumi. Tolabida jel jitsan jastik tsamal oj jkʼuluktik.

Ja Jyoba wa skʼana ja weʼn ti oj ajyan sakʼan tiw. Ja tiw oj jnebʼtik jitsan jastik sbʼaja Dyos bʼa mini ekʼel bʼa kolomtik. Ja yujil, ¡la mojxukotik kʼakʼu kʼakʼu mas soka Jyoba, ja wego sok bʼa tolabida!