Yahwe akaraganiza ngu: ‘Tihaligaruka kubaho okurra, oburumi, oburwaire, rundi okufa. Ninyija kuragaza amaziga goona kuruga omu maiso gaabo. Ebintu byona ebibi tibirigaruka okwijukwa.’

Yahwe akata Adamu na Hawa omu rugonjo rwa Adeni nagonza batunge obusinge n’okusemererwa. Bakaba baine kuramya Ise bo ow’omu iguru, hamu n’okuzaara abaana baijuze ensi. Adamu na Hawa bakajemera Yahwe, baitu ekigendererwa kye kitahinduke. Turozere omu kitabu kinu ngu buli kintu kyona Ruhanga ekyaraganiza kihikirra. Obukama bwe nibwija kuleeta emigisa enungi omu nsi nk’oku yaraganiize Iburahimu.

Obwire obutali bwa hara, Setani, abamaraika be ababi, hamu n’abantu boona ababi nibaija kuhwerekerezebwa. Buli muntu wena ow’alisigaraho aliramya Yahwe. Titulirwara kandi titulifa. Baitu buli kiro ekirikya, tuliba twine amaani maingi kandi tusemeriirwe habw’okuba bomeezi. Ensi yoona erifooka rugonjo orurungi. Buli  muntu aliba n’eby’okulya hamu n’enju enungi ey’okuraramu. Abantu baliba baine embabazi, tibalireta akabi kandi batakurwana. Ebisoro tibiritutiina, kandi naitwe titulibitiina.

Kiritusemeza muno kurora Yahwe nahumbuura abantu baitu abaafiire. Kandi n’abantu abaafiire ira muno nka Aberi, Nuha, Iburahimu, Sara, Musa, Rusi, Esiteri, hamu na Daudi nabo tulibatangirra. Tulikorra hamu nabo omu kufoora Ensi yoona rugonjo orurungi. Kandi tulikara twine emirimo nungi ey’okukora.

Yahwe n’agonza naiwe obe omu rugonjo oru. Kandi olyeyongera kumumanya n’omu miringo ey’okaba otamumanyiremu. Nahabweki leka twikale nitwirra haihi nauwe buli kiro, hati n’ebiro byona!