«Моон соңгаар ыы-сыы-даа, аарышкы-даа, аарыг-аржык-даа, өлүм-даа турбас. Кижилерниң караанда чаш бүрүзүн чодуп бээр мен. Шупту багай чүве уттундура бээр» — деп, Иегова аазаан.

Иегова Адам биле Еваны Эдем садынга чурттадып каан. Олар аас-кежиктиг болзун деп, ол күзээн. Олар дээрде Адазынга мөгеер ужурлуг турган. Бурган оларга: «Ажы-төлдү божуп, чер кырын долдуруңар» деп даалга берген. Адам биле Ева Иегованы дыңнавайн барган-даа болза, ооң күзел-соруу өскерилбээн. Бо номдан Бурганның аазаашкыннары албан күүсеттинип турар деп билип алдывыс. Авраамга берген кайгамчык аазаашкыннарын ооң Чагыргазы күүседиптер.

Удавас Эрлик, аза-буктар база каржы кижилер турбас. Шупту улус чүгле Иеговага мөгеер. Моон соңгаар кижилер аарывас, өлбес. Хүннүң-не өөрүшкүлүг, сергек оттуп кээр бис. Бүдүн чер дываажаң  апаар. Кижи бүрүзү чараш бажыңныг база элбек аъш-чемниг болур. Каржы-дошкун кижилер кажанда-даа турбас. Чер кырынга чүгле эки улус чурттаар. Черлик дириг амытаннар бисти коргутпас, бис база олардан кортпас бис.

Иегова чок апарган улусту диргизип эгелээрге, кайы хире солун болурун сагыштаалап көр даан. Бис Авелди, Нойну, Авраамны, Сарраны, Моисейни, Руфту, Эсфирни, Давидти уткуп алыр бис. Бис шупту чер кырын дываажаң кылдыр кылыр бис. Үргүлчү солун ажыл-агыйлыг болур бис.

Сээң дываажаңга турарыңны Иегова күзеп турар. Чаа делегейге Иегова-биле кайы хире чоок өңнүктер апаарыңны безин сагыштаалап шыдавас сен. Хүн бүрүде Иеговаже чоокшулаалам. Ол найыралывыс кезээ-мөңгеде уламчылазын!