Yehova o fulufhedzisa uri: ‘A hu tsha ḓo vha na u lila, vhuṱungu, vhulwadze kana lufu. Ndi ḓo phumula miṱodzi yoṱhe maṱoni avho. A vha tsha ḓo humbula zwithu zwivhi zwoṱhe zwa kale.’

Yehova o vhea Adamu na Eva tsimuni ya Edeni uri vha tshile nga mulalo na dakalo. Vho vha vha tshi fanela u rabela Khotsi avho wa ṱaḓulu nahone vha ḓadze shango nga vhana vhavho. Adamu na Eva a vho ngo thetshelesa Yehova, fhedzi ho ngo shandula zwe a vha o ḓiimisela zwone. Kha ino bugu ro zwi vhona uri zwoṱhe zwine Mudzimu a zwi fulufhedzisa zwi a itea. Muvhuso wawe u ḓo ḓisa phaṱhutshedzo dzavhuḓi kha ḽifhasi, samusi o fulufhedzisa Abrahamu.

Hu si kale, Sathane na madimoni awe na vhathu vhavhi vhoṱhe vha ḓo vha vhe si tsheeho. Muthu muṅwe na muṅwe u ḓo rabela Yehova. Ri nga si tsha lwala kana u fa. Fhedzi, ḓuvha ḽiṅwe na ḽiṅwe ri ḓo vuwa ri na maanḓa nahone ri tshi takalela vhutshilo. Shango ḽi ḓo  vha paradiso. Muthu muṅwe na muṅwe u ḓo vha na zwiḽiwa zwi fushaho na haya ho tsireledzeaho. Vhathu vha ḓo vha na vhuthu, vha nga si tsha vha na tshiṱuhu kana u funa nndwa. Zwipuka zwi nga si ri ofhe na riṋe ri nga si zwi ofhe.

Zwi ḓo takadza vhukuma musi Yehova a tshi thoma u vusa vhafu. Ri ḓo ṱanganedza vhathu vha kale, vha ngaho Abele, Noaxe, Abrahamu, Sara, Mushe, Ruthe, Esitere na Davida. Vha ḓo ri thusa u ita uri Ḽifhasi ḽi vhe paradiso. Hu ḓo vha na mushumo munzhi u takadzaho.

Yehova u ṱoḓa uri ni vhe hone henefho. Ni ḓo guda nga hae nga ho engedzeaho vhukuma. Kha ri sendele tsini-tsini na Yehova ḓuvha ḽiṅwe na ḽiṅwe, zwino na nga hu sa fheli!