Hi Jehova nagsaad: ‘Mawawara na an kasakit, pagtangis, sakit, o kamatayon. Akon papahiron an mga luha ha ira mga mata. Tanan nga maraot nga butang ha naglabay mahingangalimtan na.’

Ginpaukoy ni Jehova hira Adan ngan Eva ha garden han Eden basi magkinabuhi nga mamurayawon ngan malipayon. Sisingbahon nira an ira langitnon nga Amay ngan pupun-on an tuna han ira mga anak. Waray sunda nira Adan ngan Eva hi Jehova, pero waray magbag-o an iya katuyoan. Hini nga libro, hinbaroan naton nga anoman an igsaad han Dios, natutuman gud. An iya Ginhadian maghahatag hin makalilipay nga mga bendisyon ha tuna, sugad han iya saad kan Abraham.

Diri na maiha, mawawara na hi Satanas, an iya mga demonyo, ngan an magraot nga tawo. Ngatanan nga buhi magsisingba kan Jehova. Diri na kita magkakasakit o mamamatay. Lugod, kada adlaw magmamata kita nga makusog ngan malipayon. An tuna magigin paraiso. Ngatanan  magkakaada masustansya nga pagkaon ngan maopay nga balay. An mga tawo didto buotan, ngan diri magbubuhat hin maraot. Diri na mahadlok ha aton an ihalas nga mga hayop, ngan diri liwat kita mahadlok ha ira.

Magigin makalilipay gud kon banhawon na ni Jehova an mga patay. Tatapoon naton an mga tawo nga nabuhi hadto sugad kanda Abel, Noe, Abraham, Sara, Moises, Ruth, Ester, ngan David. Mabulig hira ha aton ha paghimo ha Tuna nga magin paraiso. Damu pirme an trabaho nga maghahatag ha aton hin kalipay.

Karuyag ni Jehova makakadto ka ha paraiso. Mas damu pa gud an imo hibabaroan mahitungod ha iya. Hinaot magin mas duok kita kan Jehova kada adlaw​—yana ngan ha waray kataposan!