Yehofa ŵasasile cilanga cakuti, ‘Ngasipapagwasoni kulila, yipwetesi, yilwele, kapena ciwa. Cinjipukuta misosi josope m’meso mwawo. Yindu yosope yakusakala yiciliŵalicika.’

Yehofa ŵam’ŵisile Adamu ni Hawa mumgunda wa Edeni kuti atameje mwamtendele soni mwakusangalala. Jemanjaji ŵasosekwaga kwalambila Atati ŵawo ŵakwinani soni kucigumbasya cilambo cosope capasi ni ŵanace ŵawo. Adamu ni Hawa nganampikanila Yehofa. Nambo cakulinga ca Yehofa nganicicenga. M’buku ajino tuyiweni kuti cilanga cilicose cakusasala Yehofa cikusatendekwa. Mwakamulana ni cilanga caŵatesile Mlungu ni Abulahamu, Ucimwene wa Mlungu uciyikasya majali pacilambo cosope capasi.

Pacangakaŵapa, Satana, misimu jakusakala yalumo ni ŵandu ŵakusakala cacajonanga. Jwalijose pandaŵijo cacimlambila Yehofa jika. Ngasitulwala kapena kuwa. M’malo mwakwe lisiku lililyose pakwimuka tucijimukaga tuli tukwete macili mnope soni tuli ŵakusangalala. Cilambo  cosope ciciŵa paladaiso. Jwalijose cacikola yakulya yambone soni nyumba syambone. Ŵandu caciŵa ŵambone, ngaŵaga ŵangalwe. Yinyama yamwitinji ngasiyitujogopasoni, soni m’weji ngasitukola nayo woga.

Yiciŵa yakusangalasya pacacitanda Yehofa kwajimusya ŵawe. Tucapocelasoni ŵandu ŵaŵawile kalakala, mpela Abele, Nowa, Abulahamu, Sala, Mose, Lute, Esitele, soni Daudi. Tucikamusyangana nawo kucilinganya cilamboci kuŵa paladaiso. Ndaŵi syosope tucikolaga masengo gejinji gakusangalasya.

Yehofa akusaka kuti mmwejo cimsimanikwe m’cilambo celeci. Cimcimmanyilila Yehofa m’matala gane ganganimganisyejepo. Kwende tujendelecele kuŵa paunasi wakulimba ni Yehofa lisiku lililyose, soni mpaka kalakala.