XOOKIL 103
«Taalak a Reino»
Jéeobaeʼ tu yaʼalaj: ‹Maʼ tun antal okʼol, muʼyajil, kʼojaʼanil mix kíimil. Yaan in choʼik u jaʼil a wicheʼex. Maʼ ken a kʼaʼajseʼex le baʼaloʼob kʼaastak yaan kaʼachoʼ›.
Jéeobaeʼ tu tsʼáaj Adán yéetel Eva tu jardinil Edén utiaʼal u kuxtaloʼob ich kiʼimak óolal yéetel ich jeetsʼelil. Unaj u adorartikoʼob kaʼach Jéeoba, u Taataʼob yaan teʼ kaʼanoʼ, yéetel unaj u yantal yaʼab u paalaloʼob utiaʼal u chupikoʼob le Luʼumaʼ. Pero Adán yéetel Evaeʼ maʼ tu yuʼuboʼob tʼaaniʼ, kex beyoʼ maʼ kʼexpajak le baʼax u tukultmaj u beetik Jéeobaoʼ. Teʼ libroaʼ tsʼoʼok k-kanik Dioseʼ mantatsʼ ku béeykuntik baʼax ku yaʼalik. U Reinoeʼ yaan u taasik bendicionoʼob way Luʼumeʼ, bey ken u béeykuntil le baʼax tu yaʼalaj tiʼ Abrahanoʼ.
Maʼ tun xáantaleʼ, yaan u xuʼulsaʼal Satanás, u demonioʼob yéetel le kʼasaʼan máakoʼoboʼ. Tuláakal máak kun adorartik Jéeoba. Maʼ ken k-kʼojaʼantal yéetel maʼ ken k-kíimil, baʼaxeʼ sáamsamal kun antal k-muukʼ yéetel yaan u yantaltoʼon kiʼimak óolal. Le Luʼumaʼ yaan u suut paraísoil. Tiʼ tuláakloʼon yaan u yantal baʼaloʼob kiʼtak utiaʼal k-jaante bey xan maʼalob najoʼob. Maʼ tun antal máakoʼob kʼasaʼanoʼob. Tsʼoʼoleʼ maʼ ken k-chʼaʼ saajkil tiʼ le baʼalcheʼob tsʼíiktakoʼoboʼ tumen yaan u suuktaloʼob t-éetel.
Yaan u kiʼimaktal k-óol ken k-il táan u kaʼa kuxkíintaʼal le kimenoʼob tumen Jéeobaoʼ. Yaan k-kʼamik le máaxoʼob meyajt Dios úuchjeakiloʼ jeʼex Abel, Noé, Abrahán, Sara, Moisés, Rut, Ester yéetel David. Letiʼobeʼ yaan u yáantkoʼonoʼob utiaʼal k-sutik paraísoil le Luʼumaʼ yéetel mantatsʼ kun antal jatsʼuts meyajoʼob k-beete.
Jéeobaeʼ u kʼáat ka kuxlakech teʼ Paraísooʼ. Teʼeloʼ yaan a kanik yaʼab baʼaloʼob yoʼolal Dios, baʼaloʼob mix juntéen a tukultmaj wa yaan a kanik. Le oʼolaleʼ koʼoneʼex ilik maas k-natsʼikba tiʼ Jéeoba, bejlaʼeʼ yéetel utiaʼal kʼiinoʼob minaʼan u xuul.
«K-Dios Jéeoba, techeʼ jach ka náajmatik a kʼamik nojbeʼenil, tsiikil bey xan páajtalil, tumen teech beet tuláakal baʼal.» (Apocalipsis 4:11)